宅女的感慨

讀黑人的<初五赤口>，不期然泛起左"宅女的感慨"．

其實，我好怕醜架...(咳)...以前
其實，其實而家都係...(再咳)
Ok，我怕醜，但我好奇...

點解咁多單身男女呻識唔到對象？
點解A君B君同時間入行，實力以A君為高，但三兩年後，B君月入為A君兩倍？
點解賣相不算誘人的某女/君，總輕易地成為聚會的焦點人物？

重點係...
點解我咁正但係無人識貨!?!?!?! WTF!?!?! （唔好嘔住，唔該．）

轉變，需要動力．當年多得哥兒露露一下當頭棒喝
"Stop your f*cking whinning. You are turning into a f*cking mosquito!"

即．刻．反．面．啦．梗．係

但當自己都覺得繼續yiyi wangwang落去，真係同一隻蚊無分別時，我問自己，想唔想同蚊落得一樣下場？

哥兒雖狠，但無非怕我被人"一野拍Q死"．愛妹之情切，又讓我感激到忍不住口，咬了他幾啖．

跟住，到佢同我反面．

機會，要自己爭取．當你有爭取o既心，自不然發現一街都係機會．

If you don't want to get your hands dirty, that's YOUR choice.
But then, stop whinning, please.

由見到人唔知d手手腳腳擺係邊o既宅女，到今時今日唔再怕見人，最大功勞係我身邊o既朋友．

不如下篇分享下佢地教識我o既野啦，好無？
-----------------------------
多謝你地留言／電郵，當中o既問候，當然Warm 啦!

但知道我並唔係"孤獨地仆街"，仲Warm =)

關於仆街

新正頭仆街，哥們忍唔住問 "講真，仆街係咪已經成為你嘅興趣？"

仆街，算唔上係興趣．我絕唔會抽起條筋 "咦，好耐無仆過喇窩，今日仆下街先得！" 但我的而且確比其他人仆多好多街，呢樣我認．

以單一事件去檢討今次仆街，我錯在自以為熟悉地勢，估計錯誤．但翻查歷年仆街原因，有時因為心急，有時心不在焉，但更多時係真係無啦啦一冼腳就達左係度．

尤其我通常都係最清醒同著平底鞋時先仆．飲左酒或著住高踭鞋，有危機感，反而越唔會仆．但如果連著平底鞋時都要步步為營，我寧願耐唔耐仆次街，總好過每日要擔心 "仆街的可能性"．

以前仆街，無論有無人望到，第一反應總係覺得自己好樣衰，想盡快企起身同行開．到左今日，我已經唔在乎樣唔樣衰，只會同自己檢查傷勢，確定唔駛call白車先起身．

唔仆都仆左，與其強顏歡笑，不如寬容面對．最緊要人無事嗟．

當我停止抗拒仆街，反而開始想學識點去面對．例如研究下要點仆先可以減輕傷勢，又或者檢討下仆街原因．例如今次，手腕落地個下，我已經知道卸錯力，然後感覺到手肘同膊頭拉親．我好自然同自己講，下次再咁仆法，一定一定要用手臂落地．

咁，唔單止可以慳返六七百蚊醫藥費，仲唔駛痛幾日，唔洗晒時間覆幾次診．Damage control & minimize lost, BABY!

其實當我唔再怕仆街，唔再介意人地點睇我仆街，又願意學習仆街，算唔算已經接受到仆街係生活嘅一部份呢？假如難免一仆，咁起碼都要越仆越好，先至對得住自己．

唔好係同一位置仆兩次，係我對自己唯一要求．畢竟係實實在在用血淚換返黎嘅經驗．

痛，起碼要痛得值得．
坦白講，今次知自己衰乜，我當進步左架喇．但真相係點，都係要等下次再仆先知道囉．

雖說仆街是禍，但要因禍得福亦唔係咁難...

例如，你可以借呢個機會，去嗲下想嗲，但平時唔敢嗲嘅人．

或者，你發現自己比想像中幸福，因為不單止有人由你撒嬌，仲會呵返你，兼陪你睇醫生．

又或者，已經好耐無意中人的你，突然係仆完街之際，出奇地想打比一個人．

If life gives u a lemon, don't make lemonade.
Have it over tequila shots instead. =)

FW: <超級無敵海景佛跳牆>

Relgitsjg 個Xanga, 係一個我長期CD Rom 但唔曉答咀o既博．但尋晚讀完呢篇文，我真係忍唔住留言問可唔可以轉載．

<超級無敵海景佛跳牆>原文

話說有位兄長, 下班回到家中. 老頭神色慌張, 叫佢埋一角傾密計.
"今日你細佬學校打黎."
"? 做乜?"
"老師話佢出貓"
"嘩!"

其實兄長並唔係奇怪老弟出貓, 只係奇怪點解出貓會俾人捉到. 屌! 有邊個讀書無出過貓? 考試個陣都試過同隔幾行個同學傾計.但唔通同老弟講 "你出貓無所謂, 但唔好俾人捉到"? 一定發生倫常慘案, "灌輸錯誤學習態度, 鼓勵親弟出貓; 兄長被老父狂劈千多刀至死".

好咧, 於是急召當時人應訊.
********************

"你點解出貓?" 兄長懶嚴正義詞地問.
"唔記得."
"你都已經讀中一, 點解唔記得?"
"唔記得寫手冊" - 主角手冊登場
"點解唔記得寫手冊?"
"因為無抄落手冊"

屌佢, 去到呢個位兄長已經想笑出黎. 佢忍燃住, 繼續.

"點解無抄落手冊?"
"因為唔記得抄"

屌你, 咁就已經 Loop 左一次 (波兒波兒波兒魚兒小寶貝~~~).

"咁點解唔記得抄?"
"因為無睇到黑板" Thank god, 終於有新人物黑板先生出現, 唔使再 loop 落去.

"點解老師寫黑板你無抄低?"
"因為唔記得抄".

夠咧, 屌你! 再問落去都無意思.

********************
"咁默d 乜? 你點出貓?"
"詩...八句, 每句七個字, 一人背幾句"

原來 甲同學背四句 (屌你! 背撚到四句就好心背埋另外四句拉!); 老弟與 乙同學每人兩句.

"咁老師點發現你出貓?"
"我拎本書出黎睇"

兄長心諗 "??? 屌你呀, 背兩句都背唔到?"

"既然一人背幾句, 點解仲要拎書出黎?"
"默書個陣, 唔可以拎轉頭望後面本默書簿"

嘩!!! 屌你呀!!! 兄長真係差d 忍唔撚住笑左出黎呀!!

"乜你出貓之前無諗過, 默書個陣係唔可以周圍望嫁咩? 乜你以為默書個陣好似上 PE 堂咁周圍郁嫁咩?"
"er...."

好咧, 呢d 問題無答案. 而且再問落去, 兄長真係會笑左出黎.

********************
"好咧. 既然你要出貓, 即係唔識首詩. 你同我抄 200 次拉."

老弟瞳孔放大一億倍, 無奈又要屈服於兄長的淫威下.

"好咧, 讀一次首詩黎聽下"

"...... ...... ...... ..... 佛跳牆..... ..... "

兄長當時替老頭抄寫別的報名表中, 未有為意.

"再讀一次"
"...... ...... ...... ..... 佛跳牆..... ..... "

佛跳牆? 兄長心想, 這首新詩的作者也夠奇怪, 寫詩也想著吃.

"好咧, 讀埋呢次, 罰抄 100 次就算咧."
"...... ...... ...... ..... 佛跳牆..... ..... "

兄長越想越覺得不對勁. 這不是新詩, 詩的意境也和食沒有什么關係.
好地地點解會有 "佛跳牆" 走出黎?

於是一手搶去老弟課本... 一看.... 他終於忍唔住, 要衝入廁所爆笑了...

********************
<村行 王禹>
馬穿山徑菊初黃，信馬悠悠野興長。
萬壑有聲含晚籟，數峰無語立斜陽。
棠梨葉落胭脂色，蕎麥花開白雪香。
何事吟餘忽惆悵？村橋原樹似吾鄉。

* * *
Thanks Relgitsjg !

I am bitchy, but...

<人格分裂的示範>，並不是一篇拋磚引玉，騙取你們稱許或鼓勵的文．假如有人以為他人意見能夠左右我的決定，也未免太少看我了．

現實生活中，要如何將不同性格整合，統一形象，正確地表達自己，是眼前讓我最頭痛的問題．這個博，記錄了我思我言，當然難免被此刻的困擾影響．

翻看舊文，發現因文字能力之低，惹起過幾次誤會．再加上近來聽到朋友對鄙博的一些意見，令我陷入在自我懷疑之地．

從不喜歡為自己解話，但關於"晒命"，我想補充少少．

1/ <情場推銷員>的出現，只因友人被女子聲討．落在我眼中，他自討麻煩，死有餘辜．但見女子們被他下三流的把女技量KO，痛心下有感而發，寫了<疑似警訊>．許是我詞不達意，仍收到迷茫的留言．唯有畫公仔畫出腸，再寫一篇<情場推銷員>．

看法，是真的，但不能代表我所有想法，亦絕非我生活上的寫照．假如令人誤會我在"晒命"，實屬罪過．

2/ 朋友送我禮物的感動，不是兜口兜面用言語表達得了．借自己地盆記下那窩心的一剎，不過因為他們都有來讀鄙博．我平日如何待他們，有沒有回禮等，他們知道便行，沒必要一字一句記下來吧？

3/ 我沒有很多仔，亦沒有很多錢．愛，倒是多得泛濫．

唔型，我知．但無端的誤會，還是少惹為妙．
下篇，下篇我會型返．

人格分裂的示範

C+姐說:
停博數天，打算集中火力寫情場寶藥黨．下筆寫了百多字，見語調老土作狀，立即作嘔．無聊下翻看所有舊文，驚見自己的冠軍傑作，竟是長達三十五字的句子，亞軍為三十一字，季軍為廿九字，當中連一個逗號也欠奉．我問自己，這是給人讀的句子嗎？每天來讀我的癡女夢話，你們都吃飽撑着沒有別的事好幹嗎？世界大事又不見你們這般關心．我無聊人浪費時間，為啥要連累你們呢？文筆／想法得比我好比我有深度的，大有人在．你們還是讀那些益智有趣的博喇．我再怎麼努力寫，也只是一堆無聊的爛文．獻醜不如藏拙，我還是摺埋罷了．

* * *
C+妹說:
停博數天，打算集中火力寫情場寶藥黨．下筆寫了百多字，了無新意，很是氣餒．無聊下翻看所有舊文，驚見自己的冠軍傑作，竟是長達三十五字的句子，亞軍為三十一字，季軍為廿九字，當中連一個逗號也欠奉．讀著，忽然間感動起來．你們不厭其煩的來讀我的爛文，我問自己，是不是前世做了甚麼好事，而你們又是否來還債的？我無聊人浪費時間，你們也陪著我瞎鬧，這份寵溺，是無論如何還不了．唯有勤於吸收練習，加把勁兒，嘗試寫幾篇給人讀的文章報答你們吧！

* * *
C+說:
姊妹倆的爭論，豈有我這名打字員發言的空間... I just want both of them to shut up.

牛小綽敬上

牛年不日再会.

Doesn't mean I am giving up C+ musica thou. See you there for now yea?

Love you all!

DLS

今日先大大聲話"自己受唔住咀頭，入錯貨係無水回”，原來係我錯．

我只可以講，以後揀男人，記住記住千祇要揀一個SHK．

JUST IGNORE MY PREVIOUS POST ALRIGHT!?!?!?

* * *
收到電郵，又比朋友仔追問我今年係咪真係著草，係o既就開始幫我安排．

點．答．好．呢

上年十月，我由好想即刻走，變成 "走，走得去邊？走得一世？如果最後都係會返黎，咁不如唔好走喇．"

但呢幾個月，教改/全面禁煙/淫審/跨境禁毒/Domestic Violence/行會委任等，膠港已經膠到一個令人窒息o既地步．

今日再睇埋呢個基本法短片製作比賽公開組冠軍，我呢個不學無術o既小女子，又再次認真地計劃著草．

* * *

睇電視見到班神昆感性地講大義凜然o既歪理，我真係好想x嘔．

淫褻及不雅，根本就係我生活！所以我一定會做d野．

新年假期，我會同哥兒旺財再Brainstrom 下一個佢06年已經做過o既Project，睇下有無空間Modify， Relaunch為反對網絡廿三條o既項目．

點解要提呢？因為無論傾成點，我都會全裸上陣！呵呵！
* * *
對唔住，真係好慶．但再慶，都比不上痛心o既難過．

情場推銷員

生平最怕個種初相識便展開強烈攻勢的男人．

自細亞媽教落，唔好隨便接受陌生人的禮物／好意．呢條教誨，洗腦都洗唔走．所以當有個唔識嘅男人對我獻殷勤，例如送禮物，講甜言蜜語，管接送等等，我一概會當面拒絕．

總覺得一個急於討好嘅男人，本質上同一個係Hard Sell 嘅銷售員係無完全分別．佢所獻嘅殷勤，就等於"比個discount你"，或"送幾個Sample比你"呢類引你落答嘅甜頭．

目的只得一個，就係要你Buy. 當任務完成，佢當然係Serve下一個客喇．

就好似你無啦啦入連根拔行下，經唔起Sales姐姐遊說，買左對唔肯定鍾唔鍾意嘅鞋，比完錢伶住袋野，你會唔會走去鬧個Sales姐姐 "喂你賣完野就唔理我？不如我地傾下心事啦？"

好喇，返到屋企後悔啦．想退貨，最多咪比你換款．放返係男人身上，就係換個方式去相處．做情人唔得，咪做朋友．做朋友都唔得，咪做陌生人囉．

但一定無得回水囉！

And then what!? Money spent & u get stuck with a pair of shoes that you may never wear.

Ok，有人會話"男仔追女仔，黎黎去去咪係約下佢，tum下佢，送下野比佢，係咁上下架喇．"

但呢個男人，我唔識架窩！當然，點樣界定"識唔識一個人"，唔同人有唔同準則．但係我嘅世界，知一個人姓乜名乜做乜電話號碼幾號，絕對唔代表我識呢個人．

He's just an acquaintance!

唔識，唔代表唔可以識．但點去認識一個人，又係另外一回事．

咁大聲話唔隨便接受男人殷勤，唔係扮清高 (好明顯我唔係喇 =p )．我只係相信，兩個陌生人開始去認識對方，一定要建立在公平基礎之上．

當你收得對方殷勤，潛意式便會先入為主覺得呢個人"好"．

但可唔可以代表佢真係一個好人呢？
好人，又等唔等於係適合自己嘅對象？

==================
唉，我已經講得好明．咁都唔明，我無計．再講明d，我驚有人會追殺我．
==================
又又，我想開個"情場寶藥黨"系列，你地有無興趣睇架？

疑似警訊

假如你被寶藥黨騙了所有身家，疑犯逃之夭夭．重遇涉案犯人，你會否抓著他衣領問 "你為什麼要作姦犯科？為甚麼香港七百萬人，你偏偏選我來騙？"

* * *
在我的圈子內，我是出了名的笨．從電腦用品到掃把到水果再到寵物用品，我一概有受騙紀錄．

被騙得最深刻那次，是跟一位六七十歲的婆婆買絲襪．我要找一對玻璃絲襪，她塞了一對深肉色絲襪給我．我心存懷疑，她立即加句 "呢隻絲襪，好好著架．你唔好見佢好似好深色，因為佢d針落得好密，就係咁先唔易花，好襟著架．"

我半信半疑問 "可唔可以開黎睇下？"

婆婆答　"我係度賣左五十年絲襪，你唔信就算數．我留返黎賣比d OL熟客好過．" 她頓一頓　"呢對襪，衰就衰在唔係成日返貨，賣埋呢幾對唔知幾時再有！"

見婆婆一臉認真，振振有詞，又想到她一把年紀還"屹立不倒"，我以六十五元一對的價錢買了四對"好襟著"絲襪．

四對，是她說的所．有．現．貨．先不說品質如何，但那對絲襪，跟我要的玻璃絲襪，本質上相距十萬八千里．

第二天，我氣衝衝拿著三對絲襪跑去跟亞婆理論．

亞婆自信滿滿地說　"無人逼你買架窩．呢度貨物出門，恕不退換．你當我係連卡佛呀？"

我當然氣上心頭，亞婆口口聲聲"賣左五十年絲襪"，DLS，幾十歲人還學人做奸商，心地還這麼不好，抵她還在街邊捱．但最好呢，還是拆招牌，免得佢繼續騙人．

但當人冷靜下來，我開始反問自己，點解相信亞婆先？點解唔買一對試下先？大拿拿六十五蚊對，因咩事一掃掃四對先？

我可以一對都唔買架窩．也可以一直怪亞婆銷售手法不誠實．可作為擁有自由意志的人，我為自己的錯誤決定負起全部責任 - 遇人不淑好，誤信蠶言也好，皆因我"願意相信"．

* * *
歐晃訊，我哥兒們之一，是天生推銷員．他曾對我說，最成功的推銷員，會得在北極成功賣出冰塊．而竅門是 "Always mix vanity with insecurities to create a need for them. No one will buy ice to chill things in north pole, but maybe they'd like an ice sculpture for their parties, or maybe they want ice cube made with evian water."

"願意相信"，非甚麼壞事．It's actually a beautiful quality. But first you have got to be absolutely sure about what you really need．知己之餘，也得知彼，遇上疑似正貨，緊記驗明正身後才作決定．

你抽著寶藥黨的衣領向他迫供，犯人大概會一臉無辜地回答 "親愛的，作為寶藥黨，騙人可是我的營生啊！" 寶藥黨，說穿了，不過是一名推銷員．推銷員的唯一目標，是成功賣出貨物．After sales services? It was never included in their job description.

你可以說他們無恥，但有恥之士，又豈會成為寶藥黨黨員？

可我絕不會因為被亞婆騙過，便放棄尋找我的玻璃絲襪，又或拒絕再買任何絲襪．

我們呀，都是吃過虧才學精．

就當是交學費吧！

送暖到中環

蓮妹入門快有三個月，今天比昨天活潑，明天又比今天調皮．一人兩狗，總算摸索到相處方式．

這個女，野心強大，想當中環大姐大．走到街上，總是霸道地左一小篤右一小篤．劉小綽走五分鐘的路，她用七分鐘來劃地盆，再喪跑三分鐘追上我們．狗女聰明，知道街頭事，街頭了．家中老大之位，暫時不與我相爭:　"舊"地盆，歸我；但"新"地盆，她第一時間衝上認領．

近來天冷，暖風機又再度取代蓮妹小綽，長伴於我腳邊．心知這個女每見地上有新事物，總會趁我不為意時，灑兩滴尿花，將之"據為己有"．我只好每天出門前，把暖風機放到安全位置．

一夜，下班回家，累得賊死，立即把暖風機開著，倒在床上攤屍．不出十秒鐘，一襲濃烈刺鼻的尿"押"味湧入鼻子中．立即從床上彈起，追查氣味來源．一轉頭，見暖風機冒出縷縷白煙．

我粗心大意，要我媽常為我憂心，每次我都跟她說 "得喇，我唔會死蠢到咁．"知女莫若母，我果然是一個忘了把暖風機收起的死蠢．

又，我的狗女兒，大概也在用她的方法，証明她不是一條死蠢狗．

親愛的，你可知道將狗尿烘熱再經扇葉排放的威力有多強勁嘛？

試想像自己在一個注滿狗尿的泳池中暢泳吧．

還是體會不了？不打緊的，那只暖風機還在我家中．把你的地址電郵給我，我保證十二小時內送到府上．

地盆之爭，蓮妹領先一局．

* * *
有人呢，一邊聽我說這件事，一邊把事情戲劇化，完全漠視受害人的慘痛，笑得不亦樂乎．

極．無．同．情．心．囉　

但第二天，出了名唔上心的他特地來電告知，買了一個新暖風機送我．還親自擔當送貨員，把暖風機送到我家樓下．

我笑他　"你好像那些<送暖到廣西2008>的義工耶！”
他回答　"記住，千祇千祇唔好再擺係地下..."

寒冬之下，你呀，不單令我暖在身，更暖在心．

謝．謝．你．呀

獨樂樂不如眾樂樂

走路聽歌/坐車聽歌/工作聽歌/煮飯聽歌/洗澡聽歌/去玩聽歌，沒有音樂，我根本無法正確運作.

假如音樂於世上消失，我大概也無法繼續活下去．恨時間太少，更恨動人旋律太多，唯有加把勁兒，爭取時間每天聽三五首未曾認識的好歌．

貝多芬說 "Music is the mediator between the spiritual and the sensual life. " 牛年將到，我想於每夜就寢前，找一首歌寄意，再寫幾隻字總結當天心思．當是每天學點新事物，也試試培養"吾日省三身"的習慣．

有目標，便要落實執行．獨樂樂不如眾樂樂，決定另開一個C+ Musica，以音符加文字整頓心靈．暫定逢星期一至五每天更新，風雨不改，先為期一個月再作檢討．

希望你們閒時會過那邊聽聽歌．假如願意留下三兩條手毛腳毛，更好．我呀，是要人監督著，才不敢放肆偷懶．

唔，還是怕吸引力不夠．不如懸紅吧：第一個捉到我偷懶的人，有賞！(笑)　

但賞甚麼好呢？錢我沒有，二手 Sergio Rossi 可以嗎！？

至於這邊，一切如常，繼續癡女說夢話．

損友

- 借Dom的名義騙你見面，剛喝光了一瓶，有事先走也多買一瓶Veuve，讓你跟你的朋友繼續喝下去．

- 告訴你 "既然抽煙危害健康，所以更該抽值得抽的煙"，弄得你跟黃色駱駝舊情復熾，遊了幾遍煙河．

- 明明又累又醉，也陪你坐在"街邊"，在寒風中用膠杯喝Tetleys至零晨二時．

- 在既遠且冷的地方也不忘到Blog留言為你打氣平反．

- 在你發神經想知"零下廿度露天尿尿會不會結冰"時，雖則口裡拒絕，也為你作實驗給你答案．

- 不單給你好友準備窩心合適的生日禮物，更不忘一式一樣的準備多一份送你．

- 以極度行貨的藉口失約，隔天又會自備Piper獻身請罪，令埋葬在宿醉深淵的你，下午六時半又再度醉了．

- 明明是一個陌生人，卻會得令你認為送他一瓶McCallan 18是於禮不合．更讓離不開中環的你打算到大圍買一瓶酒送他．

- 不能夠靠得太近，可你還是忍不著跟他說句 "很高興認識你"．

好，就講溝仔!

尋晚同張二小姐結伴到Intercham 的活動，支持哥兒們其次，讓眼睛吃吃甜品為重．

看著負責活動的哥兒們在賓客中穿插，不能不承認，他們已經從初到步的On小子，蛻變至令女子心動的大男生．看著女子們的投懷送抱，好笑之餘，我不禁同二小姐講 "點解我從來唔覺得佢地正!?"

張二小姐答 "因為你識得佢地太早！"

每年，某國政府與銀行也會引入十多名精英來港實習．而我呢，又無情情唔知幾時開始，成為眾人o既"第一個香港朋友"．

曾經有女仔兜口兜面同我講 "勁羨慕你好似Joyce VIP咁，有New Arrival會有人打黎叫你揀貨囉．你唔岩洗o既，益下朋友都好丫！"

我笑笑口答　"好呀好呀．" 但個心就想 "o拿，你心懷不軌企圖，唔做得朋友！"

我係超級極度討厭果種走埋黎扮Friend，但只係想溝仔溝女o既人．大家成年人，出黎識多幾個朋友你唔願，一開口就"喂有無仔／女先?"．

對呢d人，我一律會答 "你肯比幾錢一個!?"

我又唔係收埋佢地係灶底，有得玩都約埋你，請問仲想點呢？

有So你到，冇So就無到．
嘩，你好So窩，真係．

Credit，要時間累積；信任，要經得起考驗；交友，咪伶個心出黎囉．個腦淨係想溝呢個果個，人地咪唔當你係朋友囉．

唔係朋友o既，有好野又點會益你先？

不過話說回頭，如果唔嫌棄初來報到o既外勞"漆孤碌"，頭半年真係出手o既最佳時機 -
Loneliness + uncertainty + vulnerability + yellow fever = 易呃易tum易上手．

你唔介意Deal with呢d野，通常呢個時候出手都會拍到一年左右o既拖．散左之後，個男仔就會開始慢慢變身"老蘭超級撒亞人"．

可惜我唔鍾意湊仔，如果我鍾意湊仔o既話，開托兒所啦不如．

又，每年咁多個男仔，真係一個都無睇中過？

有，一個，不作他選果個．

其實同呢個國家o既所有瓜葛，統統都係因佢而起．所以係呢個圈子內，我已經上左神檯，變左姑姑．

=========================

PS1: 本來想繼續寫SST 架，但唔知點解變左一篇咁o既野．
PS2: 今個星期破天荒地一日一Post，係咪濫左D呢？
PS3: 早幾日叫一個朋友好Update下個Blog，以証明佢尚存人間，佢竟然答我 "你估我係你呀？寫行街又一篇，寫鞋又一篇，唔爭在寫埋溝仔啦！"
PS4: 好，既然都比佢講中，呢篇野，我順手Dedicate埋比佢喇．

SST =

Shirts, Suits, & Ties.

I LOVE THEM I LOVE THEM I LOVE THEM!!!

爆粗時間

ADDED 1834 - 當連尊貴曾特首係立法會都講「唔想同湯家驊狗噏辯論...」，我突然原諒左呢幾位工友！　

====================
頭先同兩條狗行街，行到文武廟個頭，順路買個外賣．拖著狗企係門口等緊星州米時，三名工友坐低係我隔離張檯．

侍應哥哥 "食咩呀？"
工友甲 "唔，整個雜交喇！"
侍應 "下？"
工友甲開始提高聲浪 "雜交呀，你唔明呀？我要雜交易！"
侍應哥哥 "咁你要咩汁？”
工友甲瞄下我，再同侍應哥哥好大聲咁講 "仲駛問？梗．係．西．汁．啦．"

跟住三個工友一齊衰衰格地騎騎笑．

侍應哥哥 "下？西汁？無窩！要黑椒汁好無？”
工友甲又望下我　"吊，無西汁點o更呀？咁我要黑丟雞胸易，記住多．汁．呀．”

呢個時候，我已經拖住兩隻狗行開左，但佢地兩條狗繩又打晒Kick，我唯有烏低身解返開，無想過我個屁股會係正正對住佢地．

工友乙 "咦以，睇黎菠蘿油都幾好食窩．老友，同我整個伶走等我因間慢．慢．嘆．"
侍應哥哥 "我地無賣架窩..."

＝＝＝＝＝＝＝＝＝＝＝
我絕對唔係個種怕怕醜醜o既女仔，出去玩，都試過有人走埋黎講句 "Nice ass" or "Wow look at ur boobs"　呢類野，但我會take it as compliment，亦唔會覺佢有乜不軌企圖．

不過就真係好討厭呢挺語帶相關o既"調戲"，你直直接接係我面前講，我仲有權兜口兜面猩你．你似是而非咁騷擾我，我就連爆你粗o既機會都無，淨係可以避開．但我今次忍左，佢下次又會令其他女仔難受，直至幾時？

有人衝去佢面前指住佢個鼻叫佢收聲囉．

好痛恨自己辜息呢d行為，尤其細個係KCR比人非禮過，果時得十四歲，驚到唔知點算，淨係想落車離開．由九龍塘入大圍，雖然係一個站o既時間，但個種難受，係一生o既烙印．

到而家我都極後悔無大聲叫唔好，舉發呢個無恥之徒，令佢有機會再傷害其他女子．

亦係個件事之後，令我唔鍾意搭未必有位坐/逼人o既交通工具．

個樣都唔緊要，最慘係攪到我好怕同人有肢體上o既接觸　- 隔住衫OK，但當我d肉會直接掂到其他人o既肉，我o既本能反應就係一搥窩埋去．曾經試過夏天係Insomia玩，勁逼人，我著件背心，一路穿過舞池就係咁Hi到其他人o既肉同汗，到行到入去見到d 朋友仔時已經透唔到氣，要即刻衝返出門口．

And that was the very first panic attack in my life.

還好我呢個病好公平，無性別岐視，女仔掂我，我都會想照窩埋去．之前同張家小姐去曼谷，行行下街佢無情情走埋黎"矯"住我，要知道大家都係著住背心，又出完汗"chi lup lup"，雖然忍得住手無第一時間一搥窩埋去，亦好努力地試下接唔接受到，但五分鐘之後，我真係周身唔自然，唯有同張小姐講

"你知我有幾愛你架，咁你可唔可以就我一次，唔好矯住我行??"

唉... 我呢期仲唔係犯．小．人!?

男女難辨！？

男子涉大圍襲警被捕
(明報)1月14日 星期三 23:05
一名男子晚上在大圍美田路富嘉花園涉嫌襲擊一名警員，男子被捕。

事發在晚上約十時，警員報稱，腹部被人踢了兩腳，要送院治理。一名男子涉案，被警方以襲警罪拘捕。

女子涉大圍襲警被捕
(明報)1月14日 星期三 23:45
一名女子晚上在大圍美田路富嘉花園涉嫌襲擊一名警員，女子被捕。

事發在晚上約十時，警員報稱，腹部被人踢了兩腳，要送院治理。一名女子涉案，被警方以襲警罪拘捕。

====================
到底係警察屈人功力已達化境；公信力最高o既明報錯誤報導；定係雅虎o既技術出錯？

抑或真係同時同地有相同案件發生！？

又，本來今日要去大圍買酒，最衰無去．如果去左，話唔埋可以做目擊証人！

不應不應還是應

我"港女"？一早認了．他"廢柴"? 他也留言認了．我倆"天生一對"? 哈，謝謝你的寶貴意見．但你那短短數十字，竟然可以包含真話假話及廢話，你的Thoughts，大概比"廢柴"更Incoherent吧?

狗兒喜歡四處撒野，我理解明白．但我的愛犬們都 Toilet Trained，學會大小二便，要上街解決．狗無完狗，偶爾他們於家中Or一兩篤，我包容，但總要輕罵一句，打屁股兩下，提醒他們我絕不容許此等劣行．

"過客"留言說，女人的名聲要緊，著我不如好好的交代一次．我既不是特首，又不是玉女，犯不著"面對群眾"吧? 後來翻查到她從FB連過來，我只能娘爆的輕嘆一句 "知我者謂我心憂，不知我者謂我何求." (但你係邊個呢!? 我好想知呀!!!)

寫博，一求自娛，二為分享．偶遇知音人願意交流，是緣分．為自己定下寫博的三個守則，只望常習克己．奇怪在短短數月，有人從字裡行間，認定我這個女子，除他以外，必無他選！？

喂．我．當．你．讚．緊．我．架．窩

衷心感激為我出聲的你你你，也謝謝你及你留下令我反思的片言隻語，以及沒有參一腳八卦的眾人．

I love you all.

咸豐年代的鞋

說到鞋子，又死心不息再多打一篇．但首先，我想分享一下我媽到底有幾身．壯．力．健．

這一堆，便是我媽漂洋過海搬來還我的鞋子．與舊歡重逢，既興奮，又頭痛．蝸居淺窄，一時間要我如何妥善地安置我的新歡舊愛?

仲．有．二．十．對．不．日．送．抵．
現．在．我．打．算．開．鞋．舖．麼?

古時有孟母三遷，難道我 C+ 也該為心愛的大公二公四十公五十二公搬家? 雖說天下之大，無奇不有．但要找到一位願意接受二手鞋子作上期按金屋租的好人業主，相信機會甚微．

花了一個下午跟我的鞋兒重溫昔日美夢，也幻想一下我們的美好將來．情到濃時，突然好想為他們續一拍下艷照，留個紀念之餘也方便日後"管理"．又，一直堅持連盒收藏，只是為了易於找出鞋子．

最開心最如獲至寶的，莫過於重遇兩雙北京步瀛齋的出品．那年在北京，為著一籠傳聞超棒的小籠包跑到大柵欄那邊．傳聞，當然不可靠，但卻因此把我帶到步瀛齋的門前．

始於咸豐年代的老店，招牌貨品為千層底布鞋．那個鞋底，據他們說，是用人工一針一針的納，每平方寸要納80—100針，還要橫平豎直，做出的千層鞋才會不走样、不变形。但膚淺如我，肯乖乖付現鈔幫襯，又豈會是為他們的"用料上乘，且做工精細"?

當年令我眼前一亮的，便是帶著點點Helmut Lang 的神髓的他．(Ok 唔該唔好提我條象腿，我知，我認．)



另一雙則以紅線鏽上龍的圖案，配黑長褲幾出，但其他任何褲，娘爆．


老外哥兒們一見我的國貨出品，無不雙眼放光．終於等到有人上北京，一概不要臉地拜託那人幫忙買鞋．那人呀，特地上北京四十小時就是為了到長城去Rave，甫下機開始喪蒲，直到離開北京前的四小時還未醉醒，也不負眾望帶回十對黑布鞋，這不是義氣是甚麼!?

其實呢，這雙鞋子不是特別好穿，而壽命也頗短暫．不過呢，物以罕為貴再加一百幾十有得型下，步瀛齋自然成了送禮自用皆宜的心水推介．

另，之前讀黃偉文，讀到他介紹步瀛齋的對手內聯陞，甚有同感 -

今次來京最開心一刻，竟然給我買到Nike為奧運中國武術隊設計的高科技物料有swoosh唐裝短打。本來也有褲的，但全套之後不知穿甚麼鞋才襯，所以只半變身。此時想起如果有雙Hi-tech版的內聯陞就好了。

From head to toe，由頭講到腳，也是古今的對照。

另一個遊客指南有而時裝雜誌沒有的品牌，內聯陞是中式布鞋專家，從宣傳刊物偷來的形容是「從前北京人都渴望一生人能擁有一雙」，大概相等於100年前的 Manolo, Nike或者 Visvim吧。內聯陞的布鞋，我見過，不過不是在原產地而是日本，七、八年前在南青山Comme des Garcons總壇見過玲姐自北京買了一批回來，在原來的商標隔鄰釘了個自己的label上去，無端端成了double brand身價十倍，應該不是法定的 crossover。記住記住記住這個牌子到今天，卒之可以在古都某胡同外的特約店一次過看了三十款，原本是有點期望的，失望大概是我的問題不是它的問題，各民族傳統鞋子相繼被襯以當代時裝搬上國際舞台，我慣性以為百年老號總要有緊貼潮流的產品進化，回心再想一想，能那麼死硬地「一本通書」，其實都是幾型的。

轉載自生果報Buy Me A Sunday，全文見此

母與女

近幾星期，我每隔幾天便煩亞媽，要她陪我探阿妙. 媽不敵我的疲勞轟炸，舉手投降，答應星期六陪我到畢打街朝聖．雞脾打人牙骹軟，我亦識時務地於星期五晚約媽來我家吃飯，陪陪她逗逗她開心．

星期六，架上墨鏡在陽光的陪伴下走至國金會合媽與婆，一陣冷風吹來，不禁打了個抖．但一想到阿妙，一股暖流立即湧上心頭，自顧自的傻笑起來．

"The world is beautiful, the sun is beautiful, and tonight will be PERFECT, cos I will be wearing my new lovely adorable darling miu miu boot !!"

走入餐廳找到兩老，卻見桌邊有一只巨型紅白藍．理所當然地問她們What is this. 我媽瞄我一眼，先拿起茶杯呷口茶，再慢條斯理地答

"你知啦，我下個月搬屋，咪伶返你儲係我屋企儲左兩年個D 鞋比你囉．我數過架啦，仲有成廿對未伶比你．你最好自己入黎搬，你知喇，你儲鞋又要連盒儲窩，咁大袋，你都唔想我辛苦架係咪?"

都說三個女人一個墟，但我們那檯的三個女人，安靜得很．看戲的那位，笑得燦爛．編導，肆意地享受著她的成功感．

至於主角，當然是忙著鏟泥...搵．窿．捐．

終於捱過餐在背脊骨落的午飯，我媽以勝券在握的姿態問我 "你跟住點呀? 我同你婆婆打算去行下街，你伶住咁大袋野，都係擺返屋企先架啦可?

"革命"尚未成功，作為起義烈士，當然仍須努力．我絕不會陷亞妙於不義，讓她落入壞人手上!所以剛才一邊食飯，我已經一邊盤算著拯救亞妙於水深火熱的最佳方案．

答案只得一個，就係吊靴鬼死跟．

於是我氣定神閒地答我媽　"唔...我費事滕黎滕去喇...Rio 比我擺住袋野係P.I. 到先." （嘻，又再一次証明，朋友仔真是極之十分非常重要的．）

然後我媽給我一個　"好，你要玩我陪你玩"的凌厲眼神，我亦回她一個 "睇你玩得幾耐"的邪惡微笑．

跟著兩老在IFC 遊花園，三點遊到六點，我一邊觀察我媽，發現她只是非常刻意地避開賣鞋的舖頭，但我要試衫試裙，她毫不反對，更認真地幫眼．眼見要回家裝身的時間續漸逼近，我被逼放棄畢打街戰場．打算轉攻連根拔之際，誤打誤撞入了Arrogant Cat，成了兩老的人肉barbie，一口氣試穿了十多條裙子．

最後戰果? 我只能夠說一句 -

媽，來生換我來當你媽吧．

豬手撈麵

呢幾日，朋友仔重覆又重覆聽我講＜豬手撈麵＞呢四個字，聽到想用膠紙封實我把口．

事緣早兩晚o既零晨，我嬲到十二點走去買左一個<豬手撈麵>，成盒食晒．

扯，食豬手麵有幾大件事? 豬手同嬲又有乜關係?

戒食肉，唔經唔覺就快兩個月．無想過自己可以堅持到咁耐，但其實，又唔係想像中咁難．總之到今日，我已經可以去Ruth Chris 食Tuna　而唔會心思思想食Porterhouse.

至於麵食，對於我D肥妹仔更加係大忌．澱粉質我已經避開唔食四五年．就算食，都一定係下晝五點前．

同朋友仔講<豬手撈麵>事件，佢地個個一聽，立即感受到我當時股怒意有幾強烈，先可以驅使我唔理智到連破兩戒.

然後我想，如果我地可以量化到心裡邊o既感覺，溝通會唔會容易d呢?

"你有幾愛我?"
"一如我愛支余市廿年，不惜一切，一定要擁有到為止．"

"你有幾掛住我?"
"就好似有支McCallan 50年係我面前，心思思好想飲，但又怕飲得太快，以後再飲唔返，籮籮攣唔知點算好．"

"有幾開心?"
"仲開心過有人送十對Sergio Rossi 比我!"

"有幾唔開心?"
"就好似Balenciaga 一折，通宵排隊，終於入到去時，乜到比人買晒．”

咁，係咪易明d 呢!?

話時話，我曾經做過一個比喻，我覺得都算係歷年黎o既代表作 -

"就好似一個小朋友日日望住聖誕樹下邊o既禮物，日復日咁等，終於等到Boxing Day， 一起身，立即跳落床衝去拆禮物，拆第一份，空盒，再拆，都係空盒，一直拆，全部都係空盒．咁你明我有幾失望未!?"

朋友仔聽完，呆左兩秒，然後笑到收唔到聲．

當時我地講緊o既，係一個男人o既床上表現　=P

====================

天氣寒冷，大家記得保暖呀!

不歸路

回港三兩天，又被俗務纏得想吊頸自盡．腦震盪三五小時，震得人筋疲力歇．拉緊外衣抄小路回家，企圖把對未知的恐懼遺棄在夜街中．夜風掠過臉上，瑟瑟寒意，又似在預告未來數月的景況．

抱著小焯躲於暖暖的被窩中，讀到這一首詩又忍不著爬到電腦前把它記下...

Two roads diverged in a yellow wood,
And sorry I could not travel both
And be one traveler, long I stood
And looked down one as far as I could
To where it bent in the undergrowth;

Then took the other, as just as fair,
And having perhaps the better claim,
Because it was grassy and wanted wear;
Though as for that the passing there
Had worn them really about the same,

And both that morning equally lay
In leaves no step had trodden black.
Oh, I kept the first for another day!
Yet knowing how way leads on to way,
I doubted if I should ever come back.

I shall be telling this with a sigh
Somewhere ages and ages hence:
Two roads diverged in a wood, and I—
I took the one less traveled by,
And that has made all the difference.

The Road Not Taken - Robert Frost

"天下同歸而殊途，一致而百慮。"

人在路上，終點已定．既然回不了頭，大概只能硬著頭皮繼續走下去．

只望走畢全程之時，不懷半點懊悔．

如果我有事

曼谷夜店樂極生悲，朋友仔都急於証實我無恙．

急，是因為扣回時差，你們都是剛起床讀到新聞便立刻找我．

真．的．好．愛．你．們．

都說不怕一萬，最怕萬一．假如我真有甚麼事走了，我會想要一個怎樣的喪禮呢?

* * *
亦師亦友的黎生，年前因心臟病英年早逝，喪禮定於殯儀館舉行．老老實實，我是連恐怖片也不敢看的膽小鬼．聽到殯儀館三個字，人未到，心先寒．還好有佐治及另外兩位友人作伴前往．

踏入殯儀館，我便怕得躲在佐治身後．乘電梯至二樓，走過他人的靈堂，聽到詭異的中樂，看到嚇人的紙紮公仔，又或家屬的一臉哀傷，心中既不忍亦不安．我要佐治答應我，假如有甚麼破地獄的儀式，一定要找籍口把我帶走．不然我會發足一星期惡夢．

短短的一條走廊，但覺走了一個世紀，終於到達黎生的靈堂．簡潔的佈置，意料之外的安靜．我低著頭走往鞠躬的位置，怕看到別人的眼淚，也怕別人看到我的眼淚．

就在鞠躬之際，我忽然笑了出來．

安靜，原來他們剛在換CD.　CD 換好，小小的喇叭傳來一首我熟悉不過，卻又完全 "唔啦耕" 的Hit Song.

Shakira 的 Hips don't lie.

友人出名愛熱鬧，貼心的太太棄傳統喪禮，為他安排送別派對．Just the way he'd wanted it.

那一夜，沒有燒香，沒有破地獄，也沒有眼淚，只是一班朋友，抽著他所負責的煙草，喝著他最愛的嘉士伯，分享著他生前的點滴．

他呀，連要走，也為我們多上一課．

* * *
承黎生的啟發，如果我有事，煩請代為安排以下的喪禮:

地點 - 沙灘或大草地上，如不，有泳池邊也行．總之要戶外，最緊要食得煙同雪茄．

時間 - 3pm till late

食物 - BBQ Buffet! 無Roast Beef 同 Lamb Rack 我會返黎同你算帳．另加Paella / Fideua / Croquettas / Chorizo.

酒精 - Bollinger / Gaja Barbaresco 2001/ Suntory Hibiki 17 years. 如果我有好多身家就請你地飲 Krug 喇．

Dress Code - Anything but black

音樂 - Everything Live! Music Director - 亞龔, Jazz set - 亞康，Band Set - Nadim, DJ Set - Jason F

帛金 - 每位$888，全數撥捐智恆基金會．

身外物 - 一概賣掉，收益撥捐Hong Kong Dog Rescue / 亞洲動物基金．現金及投資(如適用)全數交由我媽發落．

另，我不要棺材山地，也不要甚麼靈位．骨灰煩請撒在太平山頂 - 生是港女，死是港女!

大致上係咁．

* * *
又，想起與朋友仔多年前的傻話．有人認為靈堂上的四個大字過於公式化，決意為未來作好準備，自訂心水字詞．

我們當然七咀八舌的提議他用甚麼"早死早著"， "死不足惜"，"為禍人間"等，也有人提意用 "木村托哉"或 "湯告魯斯".　可惜都不獲朋友接納．

作為電影人的他，一意孤行要用上電影金句 -

I
WILL
BE
BACK

!(*(!($(*@(1*$&!&$**&$@@@ *

* * *
最後，大家放心，我上有高堂，下有妻兒，應該有排都死唔去．

有關二週一聚

「兩週一聚」由網友Michelle發起，每月十五、三十號網上相聚，大家寫同一題目，已經聚了五次： 我有一部時光機、愛、朋友、禮物、午夜前的十分鐘。

參加了今次兩周一聚(五)的網友:
周游 (出題者)
C9 readandeat
芸淡風輕
揚眉女子
michelle
mad dog
JO 子
Sherry
yaya
Hongkie At Large
athrunz
醫書直說
audreyma
Haricot
miobb

下回題目定為色彩 (任何和顏色有關的都可以. 筆者可以色彩或某單一顏色為題目/主題, 可以是故事, 可以是散文, 甚至相片分享, 悉隨尊便), 有興趣可到出題者Mad Dog處報名.