Wednesday, December 31, 2008

兩周一聚:午夜前的十分鐘

午夜前的十分鐘, 一身疲憊的我藏在被窩中,輾轉難眠.起身走到客廳中,順手掏了管煙扔上嘴,開始環顧的房子內的陳設.

一房一廳一廁一廚,多士爐微波爐洗衣機筷子碗碟一應俱全.但鞋櫃內,雪櫃內,衣櫃內,空無半物.

我笑,笑服務式住宅總愛以"家"作為賣點.

家,誰的家?
肯定不是我的.

大除夕夜,我獨自躲在無人認領的家.

空洞,但安全.

每次喜歡上一個人,自我防衛系列便會立刻啟動,身體不其然跟著腦海中的逃生路線圖,將自己疏散至安全的地方,安全的位置,安全的距離.

總是學不會如何以安全速度駕駛這一列情感列車.不怕出軌,不怕意外,只怕車毀人亡.尤其當遇上未了解的人,未懂得的心思,不確定的狀況,安全第一.

但我還是想給你發一個新年短訊.從沙發起身去書檯上拿手機,卻發現有一個未讀訊息.

"新年快樂,只想讓你知道,自零九年零時零分起,我不會再讓你從我身邊逃脫.”是你,於你那邊午夜前的十分鐘所發過來的短訊.

你午夜前的十分鐘,我午夜前的十分鐘.當中有著整整六十分鐘的時差.

我呆呆的拿著手機,不懂得回應你突如其來的堅定.縱然我們生活在同一城市,但一而再的時差步差誤差,蠶食著我僅有的勇氣.而你卻總是吊兒郎當,一副不在乎的模樣.你到底明不明白,就是靠最後半點勇氣撐著,我才能狠下心捨你逃生?

窗外傳來嚮亮的歡呼聲,我走到窗邊,看到煙火在夜空上跳舞,迎接著新的一年.零九年的零時零分,你沒有兌現到你所說的話.

我苦笑,心早知不該拿你的話當真.

然後,門鈴嚮起,你氣喘喘的拿著一瓶Bollinger,站在那個不是家的家門外.

"對不起,遲到了兩分鐘" 你說.

那一夜,當你於床上擁著我入睡時,我悄悄的許了一個願 - 希望自零九年起的每一天,我也能夠緊握著你的手,或走或坐或睡.

但最重要的,是我倆同時同步地共同進退.
----------------------------------------

希望大家來年都過得快快樂樂, 甜甜蜜蜜!

PS ( 第一次參與<兩周一聚>便遲交, 實在該打屁股. Sorry sorry, 但視線實在不捨泳池邊的泳褲男. =p )
PPS ( 第一次寫虛構故事,我知橋段是有點老土,拜托唔好噓我娘 Ok!? )

稍後補上<兩周一聚> 簡介及其他文章連結!

Monday, December 29, 2008

曼谷唸唸碎

自十二歲後未曾跟張家兩位小姐同遊,十多年後依然有幸並肩上路,心中實是感恩. 更難得是千金小姐的姊妹倆馴如綿羊, 跟著我東奔西走也不哼一聲, 實在值得到四面佛還神.

十二月尾的曼谷, 少了點陽光, 多了點涼風, 未能在池邊攤屍當然失望, 但無減我對此城市的熱愛. 翟道翟仍然是搜集創意手作的最佳地方, 找到一家全銀首飾小舖, 手造的耳環精緻漂亮, 售價只是港幣二百.

走在熱鬧的Silom 路上, 看到一檔檔的熟食小販, 髒是髒, 卻是風情. 能夠抵受海南雞飯/豬手飯的引誘, 實在令我非常自傲. 縱然心底內是想-吃-得-要-死.

希望兩位小姐食得招積, 本打算訂下The Dome 的NYE dinner 讓她們驚喜一下, 豈料Set Dinner 竟索價五千港幣, 每位窩!! 還要早早爆滿. 哇, 泰國人好有錢呢!

人大了, 出門的行裝越來越誇張, 六日五夜的"必需品" 竟然整整塞滿一只行李箱, 我問自己, 當年一只背包上路的勇氣到了那裡. 又, 自何時開始, 不論目的地也會超 Geeky 地帶上Laptop / External Harddisk / Mouse.

身在外地, 手提電話卻偏在此時"神神地", 唉...

旅程進行中, 送上朋友的一個爛 Gag

"Oh you gals in bangkok? Have fun bangcocking!"

Friday, December 26, 2008

許願樹

我個Blog越黎越似許願樹。

想當一次主角,有卡臣送我<一口咬定你>。呻吓飲唔起Dom,有Oz獻身話請我飲。

早兩個星期,有人話請我食法國菜,我順口講聲"喂我戒緊食肉, 不過你可以照食". 然後佢體貼地陪我唔食肉,將晚飯地點定為海鮮酒家。食緊蒸魚時,佢無啦啦講句"原本今晚諗住同你去Robuchon..."

我窒咗窒 "吓? 做乜無啦啦食Robuchon"
佢好Causal咁答 "見你係Blog到話想食嘛。"

一個月前手多寫低嘅嘢,佢唔止有睇,睇完不單記得, 仲認真地行動。個一刻,口裡面嘅蒸魚雖然鹹到苦, 但我個心, 確實係甜到漏。

早兩日,又發生一件奇事。

廿四號,正當我係屋企死趕爛趕六點前Send 個稿比Printer時,有個無Caller Display 嘅電話打嚟。

"劉小姐你好, 我哋係中環On Pedder,想通知你對鞋到左,你隨時可以過嚟Pick Up"
"吓?你係咪攪錯左? 我無留過鞋播..."
"對鞋係尖沙嘴Tran 過嚟架播,尋日先買,你有無印像?"
"即係咁,如果我尋曰真係有係尖沙嘴買過對鞋,點解我唔直接拎返屋企, 反而要Tran落你地舖??"
"呀......."
"你不如Check 清楚先啦"

收線時,我心諗 "無啦啦打黎話有對鞋係我嘅, 難道佢係聖誕姐姐???" Maybe this is a scam...

隔咗十分鐘,姐姐仔又打嚟 "劉小姐,Check 左啦,對鞋係一位先生買既,佢話到左就打比你等你拎。"

呢個時候,我已經大概估到係邊個咁鬼馬。

今日終於得閒去拎呢份神秘禮物,登登登炖



A PAIR OF SERGIO ROSSI PLATFORM!!! EXACTLY MY TASTE & STYLE!!!!!

好友D,多謝晒,我真係一百萬個鍾意,一千萬個開心。假如你當面送比我,我肯定會肉緊到咬你幾啖。但你放心,你已經成功賄賂左我,我破例向你簽發兩年期免咬証,期滿時會有專人聯絡你續証安排,呵呵。(事發經過見此)

又,你哋個個都咁Sweet,再咁落去,唔知我會唔會糖尿病架呢?

Thanks guys, you made my day. And please, stay tuned as I will keep posting my wishes here :P

Tuesday, December 23, 2008

牙齒印

香港blog界鬼才卡臣, 早前寫了數個精彩故事送予其他Bloggers, 讀過了, 心裡好生羨慕, 我也想做一次主角呢!

厚著面皮問卡臣會否寫一個咬人的故事給我. 卡臣大方答應, 但說要排期至一月. 豈料早兩天收到卡臣通知, 故事竟然排在十二月廿二號出街, 成了一份窩心的聖誕禮物.

卡臣, 謝謝你送我的 <一口咬定你>.

欠你一個牙齒印, 有拖無欠.

* * *
咬人, 咬了多年.

曾經留下一個牙齒印於朋友的肩膊, 害他跟女朋友解釋至天明也未能還自己一個清白. 又試過跟哥兒旺財比咬, 六呎高的他在我手臂一咬, 留下足足三個月才退散的牙齒印. 而我當然不甘後人, 張開血盆大口奮力一咬, 留下了永不磨滅的疤痕.

也曾有朋友連續幾天打來投訴, 說我的牙齒印為他在泳池帶來過多注視, 讓他極度尷尬.

其實我也搞不懂為甚麼如此喜歡咬人, 也許因為生肖屬狗, 也許純粹是精神病. 但我咬人, 通常在表示友好.

討厭你, 才不屑放你那條臭手於我口中呢.

很愛一個人時, 既然無法吞他進肚子內, 我只能一口一口地咬. Well of cos, I love to brand my man too.

又或者我太知道, 假如他也愛我, 看到我的牙齒印時, 大概會邊嘆氣, 邊為我的任性搖頭.

但咀邊卻不期然的露出一個甜笑.

你寵我愛我, 不用送我鮮花, 也不要買我名牌手袋華衣美服.

就讓我咬一口吧.

* * *
MERRY KISSMAS PEOPLE. 希望今個聖誕節, 大家也有一個想咬 / 想讓他咬的人.

Saturday, December 20, 2008

品牌狂迷

初來港履新的法籍友人被同事帶往渣兜紅參與一個生日會, 席上不單認識了壽星女, 更成功定下兩天後來個單獨約會.

約會時, 友人問壽星女收到甚麼生日禮物, 女生竟然扁著咀說收到一個Gucci 銀包.

友人不解女生何故扁咀, 再作追問.

女生誠實地回答

"I only like LV. If not LV, I want cash."

友人嘛, 根本不懂LV為何物, 可心裡實在好奇, 世間上有甚麼比錢更吸引女生.

"LV!! You don't know LV!?!? HOW COME? Very expensive very famous!" 女生頓一頓 " Bags, wallet, shoes... you know?"

"Ah, you mean Louis Vuitton?" 友人開始理出頭緒

"No no, aiya..." 女生開始著急如何令友人明白她的尊貴品味, 忽然靈機一觸, 從手袋拿出她的LV 碎紙包作道具之用. "You see? This is LV!"

友人只得無奈的說, "Yes, I know Vuitton."

-----------------------------
對於呢件膠得幾有啟發性的膠事, 有太多話想講, 需要點時間整理思路. 但罵了人捷足先登, 只好先登出故事之始作個引子.

伸延閱讀
孫柏文 - No Excuse
林夕 - 追上潮流

Friday, December 19, 2008

工作的二三事

往年九月已經有客想Book聖誕派對,當然唔係個個都中, 但有quote 出下, 都叫有希望.

今年, 我連一個Enquiry都接唔到.

晨早預左黎手Fing六位數字預祝聖誕的賓架們全數失蹤,但我真係無想過連公司客都無埋.

海嘯以o黎,其實我無特別擔心過,尤其公司收入來源主要來自一班家庭厚o既第三代人。做呢班人生意最大o既好處,係佢地o既消費習慣基本上唔會比大市影響. 只要佢地出得街,食餐四五百蚊o既飯,開支Dom 或McCallan 18年,梗局。佢地絕唔會因為個市跌幾多點已改去食翠華或開支Moet / Black Label. 有呢班人撐住,條數其實唔難圍.

講真,我上個月仲提議緊加價,橫樹呢班人唔會因為我加十個八個%價而唔幫襯。當佢地仲肯係到洗錢時,當然要積穀防饑. 最後無實行到,只係因為怕再加價會嚇走左一班街客。

用"再"字,因為我地已經係十二個月裡面加左三次價,每次加幅3-5%. 如果再加價,將會係第四次. (係咪有d狼死呢?)

但最神奇o既係,竟然好似無客發現到. 或者,佢地真係唔至在.

十二月黃金檔期無左班賓架同公司客,公司今個月收入小左三份一. 不過對於我,就係今年o既收入少左三份一。我開始擔心出年會點。而我,又係咪應該正正經經打份工幫補下?

點都好,今朝有酒就應該今朝醉。唔經唔覺又三年。If you know me well enough, you know I usually kill things. Be it plants, puppies, men, but the "company" survived.

三年黎無驚無險,到今日仲有錢賺緊,而家唔慶祝真係等幾時?

又,朋友仔明知我會忙都為我而來,真的讓我好快樂。

有幾快樂??

AFTER THE SCENE KODAK MOMENT

Wednesday, December 17, 2008

特別鳴謝

多謝Hana 借出超高視率來一腳長傳,為敝Blog帶來破紀錄Hit Rate.

係度祝佢 心想事成, 笑口常開, 身體健康。(拜年乎?)

"我想將以下落黎嘅呢首歌,送比青春得令人怨忿Hana..."

Monday, December 15, 2008

參一腳說情變

十九年情變, 鬧得熱哄. 看戲的人, 罵得兇咒得狠. 男主角一夜間從才子貶成人人得而誅之的世紀賤男. 要定斷男主角的行為是否隸屬背叛, 我們必需了解女主角是否知情. 沒有這組Data, 疑點利益不是該歸於被告嗎?

又, 現在是誰規定兩個人的關係必須要是Monogamous? 難道不能夠是Polygamy 或 Open Relationship? 假如他們有一紙婚書, 還可以說是Bound by law 的要跟隨一夫一妻制.

可他們男未婚女未嫁, 只是很公開地承認了是一對.

我這樣說, 大概會有人罵我敗壞道德, 又或是挑戰社會價值觀.

但我們的社會, 不見得那麼保守.

財雄勢大的賭王及劉生, 公然地三妻四妾, 生果報更在副刊登了一篇教人成為甘比的文章,這些人明目張膽的實行Polygamy / Open Relationship, 不見得有人出來擲石頭.

相比起劉先生的三年抱兩, 與索女濕吻倒底有多罪大惡極?

倪生的錯, 不在攬女, 不在濕吻.

他錯在無錢.

--------------------------
有人呢, 覺得倪生的把女絕句 "十五分鐘即到"極具參考價值, 並考慮日後加以運用, 提升把女成功率.

我呢, 就好心地提醒朋友, 呢句說話, 只會對發育未完成的十八廿二妹妹仔, 或腦殘級港女有效.
比著一個擁有正常智力o既女生聽到呢句說話, 個反應大概會係

"哇, 你得閒到咁都唔慌係好野喇!"

唉, 男人得閑, 自然身痕. 佢兩頭行, 盞自己煩.

所以呢, 千祇千祇唔好比男人得閑.

Thursday, December 11, 2008

裙下亡魂

好友D於留言中以"港女著得少又怕人望"比喻我的三個寫文守則,被我以利刀指嚇,要脅他再留言澄清, 尤其他極了解我對衣着的"大方"。

早幾年他娶得美人歸,女兒身的我無緣作伴郎兄弟,只得乖乖作座上客。又因與新娘子不大相熟,是以我自命醒目地放棄了穩陣的Cocktail Dress, 換上以為親民的Party Look - Tube dress + Leggings + Pumps赴宴。

婚宴,是喜事; 親如哥哥的好友辦喜事,我當然高興得給一對新人大大的熊抱。豈料一襲週末晚上的正常装束,一個友善的擁抱,竟令我成了新娘子的眼中釘。

"喂嗰個乜水呀?着得少不得止,仲欖到你老公實一實..." 女家的親朋如是問。新娘聽罷,覺得沒面子以外,更痛恨死佬不慎交友。誤認姣精作妹,死罪可免,活罪難逃 - 好友D自此消失於我瞎混名單之上。偶爾見面,都是趁他太座事忙,又或假借開會之名喝上兩杯便匆匆回家交人。

光明正大的一段友誼,從此被逼變成比偷情更似偷情的地下友情,好友D亦成為了我裙下的唯一亡魂 - 喪失了一點自由自主。

可從這件事,我學懂了三件事:

1/ 只要正式成為了男人的太太,多無理的要求,也成為合理要求。
2/ 男人的大話,有時候,是為着配合女人的無理要求,逼不得已下編出來的。
3/ 冬天參加婚宴,穿樽領。夏天參加婚宴,也是穿樽領。

都是裙子惹的禍。

Monday, December 8, 2008

寫不得

不久前說過想做到謹慎地坦白,那時我給了自己訂下了三個守則 : 一不寫負面事情, 二不記錄個人感情實況, 三不肆意地發洩情緒。 可惜在一個微醺的夜裡,我破戒發了一篇犯了#2及#3的短文。那文當然在事後被我刪去,還以為神不知鬼不覺,豈料不單被抓個正著,更被人留言問我因由。

嘻嘻,毀屍,當然是為了滅跡。我又不是甚麼露體狂,總不能把自己的所思所想全都赤裸裸地記錄在此。個人的感受,還是留給自己靜靜細味吧。(嗯又是騙你的,那篇文嘛,起碼會招來一百幾十個對號入坐的狂蜂,我怕應接不暇囉,呵)

近日跟人吵咀,竟然被人引用自己寫的話來攻擊自己。被在乎的人如此抽自己後腿當然不爽,但也多得他衝口而出,我才知道他現已成為我的"忠實讀者"。但知道了,自我審查尺度又收緊了起碼30%. (對,我是在說你,但請你在找我晦氣前想想,我是有多在乎你,才不願你讀到令你不高興的文字。)

又,鄙博客到底還有多少隱蔽讀者? 例如最近幾篇文都有提到我的前度,於我嘛,當然是事過境遷的瑣碎回憶,但假如被前度的現任讀到,可能會引起不必要的連漪... 又或是,被我的約會對象讀到我那信誓旦旦的"不作他選",可能會認定我對前度還未忘情...

而我這個豬腦呢,竟然丁點兒沒有想過這等可能性。但要是連這等"可能性"也成為發文的考慮因素,要繼續經營這個博客,大概只能繼續寫寫狗兒們的二三事吧?

早幾天跟羅慧蘭碰面,兩星期不見,寒喧數句,她呷到第二口氈湯力時已急不及待地問我 "親愛的,你最近的性生活如何?". 今夜晚飯時,又到冰美人來電問我那裡才買到老外Size的dom dom。回家,甫登入MSN,放洋進修的小S又傳來一則 "親愛的,我昨夜終於跟xx嘿咻了。"

我們這一伙單身女生,大慨是特別好色吧? 平日我們把酒談性論男生,口沒遮攔,爆出不少打死不會認的賤話笑料。連哥兒旺財也說,把你們的Dating Stories 寫下,活脫就是港版Sex & The City。

我又何嘗不是十萬個想寫? 但回心一想,假若有天遇上喜歡的男生,他一讀這個網誌便摸清我的衰格好色口賤,又或是知道我會如何色誘他,你說有多煞風景。

所以呢,東寫不得西寫不得,寫南不是寫北也不是。我,當然是悶納得有咬人的必要囉!

Thursday, December 4, 2008

怕不怕冷

週二晚, 與香港雜誌攜手攪了一個派對. 到達時已有數十人在場, 瞄了瞄在場的眾人, 我又忍不著說了句 "點解個個都著到好似發冷咁?"

攪派對, 最理想當然是男仕們著得"有咁型得咁型", 女仕們就著得"有咁少得咁少", 但那個晚上, 不單有大摟頸巾長靴, 仲竟然有手套!!

當我除低外套, 成為二百人派對內唯一穿著背心的女生, 你大概可以想像到我有幾異相.

但我堅持, 是其他人發冷, 非我不怕冷.

* * *

週三, 一覺醒來, 頭, 痛得似要裂開. 以為是Hangover, 決定再睡一會. 這一會, 睡了六個小時. 醒來的時候, 全身乏力, 喉嚨似被火燒的刺痛, 額頭發滾.

嗯, 病了. (是周二晚冷病了!?)

立即想到要跟士幫灑取消會面, 電話接通後才依依丫丫的有口難言. o奧, 連聲都失掉. Nice! 唯有捧著脹痛得要爆裂的頭, 一口氣發了十多個短訊電郵交待交待. 最重要的是, 找媽過來幫忙行狗.

想要去看醫生, 但著實沒有力氣上上落落爬十層樓梯. 躲在被窩中大睡特睡, 一件Fleece Jacket, 一張綿被兩條毛氈, 人, 還是冷得發抖.

難得睡著, 又被連連惡夢困擾. 醒來, 一身冷汗, 翻過身, 捲著身體拉緊被子, 卻感到前所未嘗的寒意. 矇矓間想起Ginger & Gordito, 他們離開的一刻, 小身軀也是這樣漸漸降溫吧? 我, 又會不會跟他們一樣命運? 一想到死亡, 人立時驚醒過來, 睜開眼第一樣做的是推推身邊的小綽蓮妹, 見他們還有呼吸反應, 一顆心才安定下來.

也許我真不怕冷, 但心裡的寒意, 卻無論如何學不懂如何面對.

* * *
又, 人病了, 之前還在抓爆頭在想該要如何處理的Kraftwrek 門票, 順理成章蝕讓給朋友仔. 朋友仔貼心的上門交收, 還帶來一支1.5L寶曠力來探病!

寶曠力於我們, 已榮升為居家旅行必備良藥. 無論是精神不好, 體力欠佳, 宿醉回魂, 感冒發燒抑或周身骨痛, 常服寶曠力, 藥都唔洗食.

朋友仔真的好可愛!

Monday, December 1, 2008

關於等...

前度二號曾經話我 "你係我識過最無耐性o既女仔."

出街一定打的, 食飯一定訂檯, 戲票一定預購. 約一兩個朋友見面, 我一定準時到達, 自己唔鍾意等, 亦唔想人地等. 但約超過三位朋友食飯的話, 我例牌遲到, 因我最怕餓住個肚坐係檯等人齊先叫得野食.

跟例牌遲到的朋友見面, 我通常會約佢地係屋企附近, 咁我可以等佢打比我先落樓.

時間,屬於我.要怎樣用,由我決定.等與唔等,亦係我O既選擇.

你遲到要我等,咁唔該你有心理準備

我.會.走.

如果你預左我會走都遲到,咁,即係無誠意.

無誠意,就唔巧約喇.

(*@@(&^%$@@*())*&%$$

* * *

尋日誤打唔撞入左一個綿綿情話的Blog,細看,原來全部都係"不能說的秘密”.

女生暗戀那位男子,已有六年.一直等緊男子發現自己係佢背後.跟住我即刻望下月曆,CONFIRM 一下而家係咪2008年.

愛在心裡難開口,也許浪漫,不過就...

唔.Practical. 囉.

暗戀無罪,明戀有理.但心裡面有一個人,你估無Opportunity Cost架? 再者,你認唔認同都好,作為女生,係真係有Time Depreciation Cost. 本身已經係一件蝕本貨,仲要走去做蝕本生意,容許我粗俗d講句 -

豈一個七字了得.

點解我咁清楚? 因為我係49 囉.

* * *

返番2008年,我突然發現自己有一個死穴.每當有男人同我講"我等你好耐",我自不然會感動得有d腳軟.

當然我知道佢地所謂o既等,係一邊Have fun, 一邊"等"我come around. If a better one comes along, it'd be a huge surprise that they even remember my existence.

Hey this is 2008, it's unlikely for someone to wait for anyone.

但佢地肯講出口,我認我係次次都霖.

最攪笑個次,出自一個現已結婚生仔的男生

"以前,我等你定性;而家,我等一個可以收服到你o既男人”

Hmmmmm, 點解要用"收服"呢!? 我又唔係妖魔鬼怪.

* * *

與前度分手時,我DHL了一本小王子給遠在印度的他.幾天以後,我收到18支紅玫瑰,卡子上寫著 "Roses For My One & Only Rose"

他讀了,認為我是玫瑰.其實,我自覺是那頭被馴服了的狐狸.我不知道他算不算收服了我,但曾經一度,我們互相展開了一場馴服的角力.

單身呢兩年,身邊朋友都以為我等緊佢.

以我性格,我絕對唔會等任何人.但假設我會等一個人,果個一定會係佢.

不作他選.

* * *

最近呢,朋友仔之間發生一件八卦事.

一直令男子們認為可望已不可及的冰美人,竟然跟一個讓大家O嘴的人一夜風流.他們兩個,更是當晚才認識的.

男子們當然dup心dup肺大叫 "我等一個機會等左咁耐,點解果個唔係我??"

又再一次証明 Timing o既重要性.亦帶出左所謂o既等,係幾咁無謂.

對於冰美人呢件事,我只有一個Comment

"Christmas miracle came early for that lucky guy"

* * *

呢篇自慰式廢話,係我訓醒時見到自己身上十幾達紫黑色Bite Mark時所寫o既.

上得山多,果然係終遇虎.

有趣,有趣.
 
Clicky Web Analytics