Monday, May 13, 2019

失身失好啲?

母親節,男子找我,問我對於有欲失身的少女,可有建議。

而我竟然唔想知點解。例如為咩少女唔嚮往先有男朋友。

呢十年,已經太多方向指出,女子主動失身,可視為自主。

i say when, i say where, i say how and i say who.

「咁樣好咩?」有人問。

如果女方唔相信婚姻係必然時,咁點解應該留起第一次?

對性持咩價值,已經好難用保守方向討論落去。就好似體育普及,女性對身體有更多認識,甚至對裸體嘅接受或熟悉,都已經解禁不少生理反應(或urges)。

只不過,一向呢啲方向走,就連sex haze, post-sex depression 都要接受埋。而當睇到呢啲,其實就會對body shaming alerted。

如是者,我又製造咗粒糖衣毒藥:叫佢介紹個少女睇Love & Other Drugs。

「做女仔呢,除衫唔係問題,但要令眼前位觀眾有呢種反應呢,先算達到重點。做到劇中Hataway個隻先算成功感!」

然後我忽然神傷,男子與我,竟然到咗要度橋氹啲𡃁妹「失身失好啲」嘅年紀。

而朋友,竟然真是宅的好。

噚日啲對白:

「一個男人砌唔砌得過,有樣睇的嗎?」
「你問個食齋嘅點揀牛扒?」
「咁呢啲嘢我當然要問你。」
「咁呢啲嘢你問得我我當然會答你。」

但我估,對於感情脆弱嘅宅派:
「最基本係,做完後,唔好有人覺得蝕底。行返出門口時,唔好覺得跌咗啲自尊或自信。」

而呢句說話,居然係男女通用。

PS ( 曾經一度,我有諗過出借身邊嘅朋友,幫下啲想失身但又怕遇人不淑嘅中女。但後來發現名單上欠缺臘腸會導致有欠公允。XD)

Sunday, May 12, 2019

腌悶

本週腌悶,港聞繼續挑戰讀者極限。

於是我閒時又再查下香港字典,例如發現「小三」呢個詞語,應該泛指令原本一男一女制關係受創嘅第三者。

如是偷食係咪等如有小三?就好似,應召嘅妓女唔係小三。
又例如,得閒炒吓嘅飯,其實係印證住男女關係嘅另一種開明。

做人嘛,認真就會輸的。

例如如果我認真哋問:「點解男人扯旗可以話一時衝動,但女仔一時心軟擘開條脾,就係賤格?」

咁我就應該大概輸咗。男人硬先係正常。女人擘脾一定係攞嚟賤。
(而生理反應唔係應該包括肌肉控制嗎?)

有人覺得我呢段寫得好夾硬好煩好腌滿嗎?
咁都值得長篇大論去解釋嗎?

偷食?有屌無屌都好,比人閒話就已經唔啱! 
係囉。印度男女隔離咁多年,一定唔會惹起啲咩誤會。

而過去七日,香港要聞,係咩?

「我哋唔係無屌,不過唔等於我哋偷食。」
(我哋唔係無主席手冊,不過唔等於我哋會跟議事規則。)

七日,足足七日,係七日,由班夾粗無跟議事規則嘅人形燒,去維護一個無legitimacy嘅主席。

'Lawmakers need not follow the set protocols.' so they defended.
然後仲要矯情到話咩民主最黑暗嘅一日。

咁請問啲lawmakers係被咩law govern?

ho yim moon ah!!

Thursday, May 9, 2019

齋戒食肉

「我去襟機先。」

凌晨兩點,女子一個人企係皇后大道中,同男生隔住玻璃門。

只係幾分鐘時間。
「佢㩒咗幾多錢?」
﹝唔知﹞
「咁佢銀行戶口有幾多錢?」
﹝點知﹞

「你唔想知咩?」
﹝...﹞

當心裡出現呢把聲音時,我係咪已經要接受魔鬼嘅存在?
而我只不過係由於見過一個場景。

--------------
「我去襟機先。」男生話。
「好呀。」於是女仔跟住入去。
然後女仔對佢襟機好奇。
「你用咩做密碼?」女仔問。
「唔講你知。」男仔答。
「耶,快啲講。」女仔再問。
「唔講呀。」
「快啲!」女仔堅持。「定係你用緊個ex嘅生日做密碼!」
「黐線!點會!?」
「真係?真係?」女仔笑。

然後個女仔就搶過去襟櫃員機嘅畫面。
「你做咩?」男問。
「幫你改密碼囉?」女奸笑。
「黐線㗎咩你。」
「做咩喎!」然後個女仔推開佢。好快咁將個新密碼改咗。
「你黐線!」
個女仔已經襟返張卡出嚟。

「密碼係我生日,跟住你生日。」個女子係佢耳仔邊講,跟住錫咗佢一啖。

個男仔哭笑不得,因為,佢真係唔係好記得個女仔幾時生日。

「唔記得我生日?」女仔收埋張卡係身後。
「...」個男仔支吾。
「咁要罰。」女仔又奸笑。「等我睇下你戶口有幾多錢先。」

「喂唔好啦。」個男仔阻止。
「咁你係咪想算數?」個女仔問。
「......」男仔又答唔出。點講呢,個女仔約過出嚟幾次,有拖吓,有試過錫,平時有係微信玩下sexting,佢又暗示過可以裸聊。

「喂,你要襟幾多錢?」個女仔問。

如果你遇到個咁嘅女仔,你會投降嗎?戀愛嘛,喜歡一個人嘛,當然係你食住我,我食住你啦。

然後,又唔知點解,與其點都係要比人食次,咁佢食得住你,唔係好現象嗎?

唔錫你,點解要管你?
又無佢符喎。
佢做啲咁夾硬,咁乞人憎嘅嘢,但當佢返嚟錫啖時,有冇冧先?

無推開佢喎。
(點推開啫。)

「不如去食嘢嚕。」個女仔提議。然後,佢翹住個男仔隻手行。男仔好乖咁跟住佢,然後係經過便利店時,不其然諗,「要唔要買盒避孕套呢?」

個女仔不期然露出勝利嘅微笑。
因為個男仔應該開始投誠。
-----
「諗咩呀?」男生撳完錢行出嚟後問。
「嗯...諗緊警訊。」女子答。
「警訊?」
「夜媽媽係條街嘛。」(笑)

個男生有啲無奈。咁奇怪嘅呢條女?
個女生又莫奈何。對方察覺到我食齋嗎?
齋戒食肉
 
Clicky Web Analytics