「我另外有人，還有了孩子。」男生如是望著我說。
我呆一呆，五年沒見，如此坦蕩，我情何以堪？
「離婚了。」
我夜機抵港，一覺醒來，吾友來接我食晏，三幾句後，撲出這句。我釋疑。畢竟這老友，日光日白，甚少可以於我旁邊出入。
然而瘋狂，於四十八小時以內，兩個精英型男人，都跟我談「情」。有時我頭疼，是我嗎？作為宅女，我一年露臉有十次嗎？竟然每次都惹來盛情。
事發已經包括：女子無端於我面前痛哭。（當然啦，跟我男人睡上了。）男子望進我眼中，忽然就流下淚來。（他說，你要珍惜自己。）曾經也試過有人因我出現，立即離席抗議。（當然也是男人的床伴）
也試過有人無端坐到我旁：「我跟他睡過，你不介意嗎？」
我也竟然回答：「我怎能介懷於我所不知的事呢？但如果你是指他四周圍睡的習性，那不，我不介意，因為那是他的選擇，涉及自由，亦由於外間一般對我倆關係有誤解，例如，你如此查探，是認為我跟他是男女朋友吧？而你期待著有什麼結果？
對此我不介意，亦不好介意。但對於kiss & tell，以行為而言，我介意，是以一向當是規矩，不以逾越。不過也止於對外，對內，女生當然互相提點，避免利益衝突。」
是因為我太戇直，所以才會有這種對話吧？例如對那個五年沒見的男子。
「我另外有人，還有了孩子。」
「啊，那開銷不是很大嗎？」
「對呀，所以自己沒錢。」
「正室那邊，家用有一萬美金嗎？」
「差不多。」
「另外那邊有六千美金？」
「大概。」
「嗯，非常合理啊！」
他望著我，表情很複雜，例如好似想問，小姐你係咪燒壞腦？
而我都好刻意自制先唔問：「如果有三奶，佢頂薪係咪四千美仔？」
然而你知我，都唔想查究why how and when。對於人嘅出軌，婚姻嘅變質，有時，就好似我老友咁，睇住佢拍拖結婚，後來生仔。佢第一次有出軌意圖時，我勸佢：「無必要嘅，可苦挑戰自己底線？」
後來，佢無繼續追求嗰個女仔。再遇到另一個女仔時，佢諗都唔諗，開始咗先算。
如此又擾攘十年。三年前，我哋最後一次食飯，係WHISK食晏。當時我拍檯：「你偷食偷到個心口去咗阿二個邊。」
我幾近怨念。
「你夠膽係我面前比我見出大陸妹同你玩邊套？」
唔識路返屋企，咪就係，係出邊食埋人茶禮，受埋人管教，都仲以為無人發現佢連思路都變埋。
而我嬲，係嬲呢啲。就住玩，真係見少買少。
於是，當佢同我講：
「離婚了。」
我竟然係問：「你而家緊急聯絡人填邊個？」
佢答：「未知呀。」
你話，為咩？十年情人，但，並非緊急聯絡人。
於是我覺得荒謬，就正如男人同我，好多人以為係情人，但其實最重要係，佢係我緊急聯絡人。
已過去，我有好多努力，都係為某天，我都可以係佢嘅緊急聯絡人。
雖然佢大把選擇。
但細個時，我真係會覺得，咁唔好咩？都屬於Fair。
但後來男人叫我認得，最Fair係，我有另外嘅緊急聯絡人，而我亦足以成為他人嘅緊急聯絡人。
所以，近年最感動個一剎，係有人同我講：「緊急聯絡人？你可以填我。」
但當然我知道，有啲咩，佢係會第一時間簽DNR，第一時間掹喉，同會係第一時間尋求安樂死嘅人。
復康，係漫長已且艱辛嘅過程，甚至唔一定有結果。佢好清楚咩係nursing，所以如果問佢，佢一定唔會同意搶救末期病患。
但同時，咩叫愛呢？係咪連當自己都覺得無尊嚴都極時，都有人仍然想同你一齊笑，想見你咩都充足，總算叫得到安樂？
而對於情愛，我大概，就已經似一個末期病患。以前會好奇人係點樣情愫互生，點解愛得起，點解愛得合；但如今，就好似始終要面對不足，要面對解決，甚至要面對出軌。
連我都反省咗友誼。如果好朋友，唔通因為你另外有人，我對你改觀，甚至改變信任，例如，唔再對你重視？然而，我又值得堅持採取non-judgemental嘅方法？
尤其明知你有份令女子落淚呢。
於是乎，竟然係情愛中唸出成本效益。
(然而於我雙眼內，你仍然會看見完整得不曾受過傷的可幸嗎？
如果疑點利益歸於被告，然而，真相可恨，那世間，又有甚麼可以寄託？)
Posts
