Friday, February 20, 2009

宅女再培訓

週六,Girls Night Out.艾雲娜問張大小姐
「要做一個靚女,係咪一刻都唔可以鬆懈,要時時都Keep住靚?」

曾經我好疑惑,點解張大小姐落街放狗,著件背心,加條綿質運動褲,都咁索咁正,但我著上身就成個阿嬸?自己先天條件不足,由九歲識佢個日已經知道.但,無理由爭九十九條街咁遠架.

之後寄居係佢屋企一段時間,慢慢我觀察到,就算落街放狗,佢都要起碼搞廿分鐘先出得門口.到底搞咩呢?

佢紮條馬尾,唔係我亂咁伶橡筋紮住就當係.係用梳好仔細咁紮,我以為不經意既零亂,原來係有技巧地營造出黎.呢Part,用左6分鐘.佢著個件背心同條綿質運動褲,買個刻已經有揀Cutting/質地,出街前仲會襯一襯,有時又撞下顏色,令個Look望落有Sharp醒既感覺.呢Part 又用左8分鐘.跟住佢會花三分鐘企係鏡前面.檢查下個樣同Look,再順手戴埋適合既耳環/手鍊/頸鍊.最後三分鐘,用黎著鞋/綁狗/伶報紙鎖匙.

個時我諗,嘩,煩到咁.唔好搞我!但因為實在等得太耐了(Weekend 去玩阿大小姐起碼要九十分鐘先出得門口囉唔該),咁我橫事坐係到呆等,咪學佢搞下呢搞下路當消磨時間.搞搞下,發現同一件衫,襯唔同妝/髮型,可以Dress Up / Dress down,有唔同感覺,換句話說,可以買少左野.又,當有朋友仔突然間講句「咦你呢排靚左喎.」,「你今日咁著幾好睇.」,口可能答係咩係咩?但個心,開心到飛起.

以前覺得You are what your wear 絕對係一句Marketing Slogan!衫之嘛,不過係一張花紙唶,駛唔駛講得咁嚴重?

但而家我開始成為信眾!尤其當我發現,張花紙吸引,唔單止會更加顯眼突出,亦會加強他人好奇心,令佢地更想知道花紙入邊包住乜野.(I am talking about the soul / brain, not the body u dirty freaks)

係,開頭真係覺得好煩,但慢慢習慣後,其實又係一種紀律,對自己既一種要求.Wyman曾經寫過一篇喂,你點揀衫o架?,我好同意下面呢幾句:

- 要穿得好襯得靚,首要條件是要知啲嘢喺邊度搵返嚟,正如煮席好菜關乎於最美味的食材自那兒找,這點修煉不能懶。

- ….(佢)出手就係襯得咁靚,本能嚟嘅,修養嚟嘅,唔通專登襯得肉酸啲?冇人見到嘥唔嘥?一啲都唔嘥,當係襯衫練習最好,平時喺河北省金川鎮體育館,喺冇觀眾情況下也揸正嚟做練練練,他日參加奧林匹克上鳥巢才不會在幾千萬人面前失手啊!

- 要着衫襯衫所謂進步,必須由你未試過的東西組合開始,即係你以為「唔着得出街」的衫。


又,做咩講著衫?聽日開估!

11 comments:

JC said...

同意。
人靠衣裝真係冇錯呀。

C+ said...

你呢,鍾唔鍾意玩著衫?

自由行 said...

同意 x 2
不過先天問題(品味)亦好重要.

篤篤篤撐 said...

先天問題(品味)亦好重要
>>>
我有丫, 所以唔練習,
結果, 嗚~~~~~

C+ said...

自由行,我傾向相信天資再好,也需後天努力的!(拿有篤撐做人版了!嘿嘿!)

篤撐,咁晒料,我恨都恨唔到播!

Gwen said...

配答得好就好,差少少就變師奶架啦!有D人真係唔適合某D look就點都係九唔撘八.

加上個人品味都好重要,否則你點配答都唔會答得好!好明顯妳同妳朋友都係有品之人!

我係D鎮仔到住,就沒有這個煩惱!

小瓶子 said...

Wyman D 衫, 有D 太前衛, 我接受不到.

而且, 由于觉得佢唔靓仔, 所以佢越搞gimmick 野, 就越恐怖.

C+ said...

Gwen: 女為悅己者容,就算你出街唔駛襯衫,你肯定咪埋係屋企襯Victoria Secret呵呵!

又,是我的朋友仔有品味.我不過是她們的Barbie!

瓶子: Wyman的品味,我多少有保留.但我喜歡他認真的穿衣態度!=)

JC said...

我鍾意玩著靚衫。mix & match。

又鍾意見到其他人著靚衫。

自由行 said...

um...講著衫. 我覺得eason 嫂係型架!

C+ said...

JC >> 快d post d 型衫上黎分享下好喎!!

自由行 >> 小留意本地花生人,因為佢地d 衫貴,就算想跟佢個Style,又唔知佢邊到找平價老翻!=p

 
Clicky Web Analytics