春宵一刻幾千蚊

三號風球下，一行十二人到銅鑼灣唱K為哥兒們之一慶生.

經壽星仔嚴選後，指定地點為一所日本人開設的上樓KTV. 面積兩千多呎，兩位店員，家庭式環境，自助式服務，隨意得有如係家中唱歌一樣.

至於點歌系統，就停留左係十年前o既system. 要點歌，係先要從四本黃頁電話簿厚的歌書中找出號碼，再以人手用遙控輸入.

咁o既環境同Setup，唔似高消費地方啦．玩左四個鐘，飲左兩支Absolut， 一支Black Label， 五打罐裝朝日啤酒. 以常理推算，六千蚊應該有找啦. [HK$3,000 (bottles) + HK$2,000 (beer) + HK$1000 (Soft Drinks /Mixer / 10%)]

但當手寫單埋黎時，我嘩左聲仲問WTF囉.　

第一行，Absolut x 2 = HK$1600 (八百蚊一支, 抵呀).
第二行 ，Asahi x 60 = HK$1,500 (廿五蚊罐比想像中平播).
第三行，Black Label x 1 = HK$800 (正常啦)

跟住就見到...

HK$5,000 Room Charge　

我唔係眼花丫嘛? 今時今日仲有K場收Room Charge? Minimum Charge 咋嘛?

出去問日籍Manager，佢堅定地答我 "系，快兜晨，loom 叉住. 撈links"

仲．唔．係．入．左．黑．店?

唯有入房問壽星仔訂房時有無同人講清楚，佢極之冷靜咁講"I knew. No worries, I planned to cover the room charge anyways", 然後係褲袋伶舊皺到似廢紙多過銀紙o既"波"比我.

邊個比或幾多錢根本唔係問題，最大問題係價值．假如我地今晚去"首席執行"，一樣玩咁耐，飲一樣 o既酒，淨係Room Charge 可能已經埋到單.

咁點解明知呢度貴過人都要黎先? 人地仲有Wii 玩播!

壽星仔話: "They have the most extensive English song list." (喂你肯唔肯定呀? Source從何來? 有無求證過先) "STOP WHINING, CEO doesn't have Gypsy Kings!"

你．講．呢．句．我．收．聲．囉
一．首．佢．地．o既．歌．你．都．無．唱．過．囉
有．o既．話．我．即．刻．食．左．支．咪．都．得．囉

覺得好唔值好肉赤之餘， 仲要比佢咁激，我真係有想過撲埋去咬死佢！

不過樂觀地想，可能個天知我最近對計劃中Project失去信心，想同我打打氣, 特登比呢個好機會我親身引證另一個niche market 例子喇.

更可況壽星仔開心，朋友仔盡興，錢唔可以衡量一切家嘛.

之不過當我簽卡埋單時，見到收據上寫住九千五百四十四個大洋，腦海就不其然浮出 Mastercard 名句 - "MEMORY, PRICELESS"