My new love :)

一樣的悲哀

一零之夏, 悲劇連連. 天災橫禍, 事出突然. 悲痛之餘, 我們總嘗試查找因由, 追討當中牽涉的人為過失 - 搶救緩慢, 後援不善, 物資被掠, 領導無能.

試問危急之際, 有幾許前線工作者特意拖慢救援, 又或執意讓多幾條人命無辜送死?

能力之高低, 由資源及栽培決定. 國苦, 一百萬災民無了期捱餓抵冷, 等待全球伸出援手; 國富, 軍用直昇機提供物資, 全國人民募捐賑濟. 國強, 幾條人命枉死登國際頭條; 國弱, 幾十人慘死是每日新聞.

危難之際, 國力是天是淵, 避無可避, 高下立見.

悲劇在目, 氣憤痛心當然, 但每當想到該國的人民, 世世代代, 日日夜夜, 都不曾逃出過我今日的所感所受, 始作俑者的絕望, 竟然勾起我丁點同情.

單次的意外, 是悲劇;

多次的悲劇, 是苦難;

一樣悲哀的, 是人民.

國藉膚色, 均是與生俱來. 聲聲追究譴責的背後, 是對生命的尊重, 對公義的追求. 如何詮釋, 在今生有限的時間之內, 你我他皆能各自演繹.

願默哀與祝福, 暖透每個孤單的心靈.

A lesson on sharing

今日終於明白, 點解我咁唔願意記起中學既日子.

因為果個係一個眾人都極端討厭他人喜歡自己所好的地方.

我喜歡A, 你也喜歡 A嗎?

哼, 你跟我!

我喜歡A, 你也喜歡 A嗎?

挑, 你憑/識/明咩?

我喜歡A, 你也喜歡 A嗎?

你認你跟我, 我咪受埋你玩囉.

So much about sharing.

讀陳食客有感

Inspired by:
(明報)2010年5月23日 星期日 05:10

鮮茄豬扒飯無鮮茄釀武鬥 食客吃光後要求減價 諷刺店員捱打

===============================================

政改飯無普選釀武鬥 市民吃光後要求普選 諷刺高官捱打

(日月報)2010年5月23日 星期日 05:10

【日月報專訊】「2012政改飯點解無普選？」一名男子昨午到油麻地廟街一間茶餐廳午膳，吃光一碟2012政改飯後才投訴飯餐中只有普選路線圖點沒有普選，要求減價兩元被拒，不忿下揶揄店內女高官語帶鄉音疑是保皇黨，最終被店內男高官打了一身後有感而問。

現場為廟街47號地下一間港式茶餐廳，以魚蛋粉馳名。遇襲男食客陳×峰（33歲），被打傷頭面及右邊身體痛楚，送院敷治後無礙。涉嫌毆打的食肆男高官洪×榮（53歲），事後被捕帶署。

根據該店基本法顯示，引起事端的2012政改飯每碟賣24元，相中有白飯、普選及2012，全面直選加6元。記者事後光顧該食肆，同樣點了2012政改飯，女店員刻意詢問﹕「係咪真係要普選呀？」記者答是，之後送上的2012政改飯連3片路線圖一併奉上，另加一小碗伴盡快汁，盡快汁中沒見到有普選.

店員拒減2元 食客揶揄口音似保皇黨

事發昨午12時許，陳到該店午膳，點了一碟2012政改飯，一口氣將飯餐吃光後才向女高官投訴，指飯餐只有盡快汁沒有普選，與基本法不符，認為貨不對辦，要求減收兩元，女高官拒絕講價後，陳疑感不忿，揶揄女高官語帶鄉音疑是保皇黨，冷嘲熱諷一番後才付足24元結帳離去。

未幾，食店一名男高官得悉事件，衝出店外窮追近百米，在文明里街頭追上陳理論，陳在糾纏間報稱被人打傷，報警要求送院。警方事後與陳返回茶餐廳調查，以涉嫌毆打罪名將姓洪男高官拘捕。現場消息指出，有人報稱是誤會食客吃「霸王餐」而打人。

大律師﹕進食後投訴「死無對證」

大律師陸X雄說，事件中關鍵證物是出事一碟2012政改飯，但男食客食光全碟飯才作投訴，可謂破壞證據「死無對證」，無法證實飯餐是否包含普選，然後又要求減收兩元，似有賴帳之嫌。陸偉雄說，法例上並不視基本法為買賣合約，只屬於政策介紹書，市民如認為基本法文字或照片描述與實際不符，可拒絕進食及向消委會投訴，如果市民覺得被騙，甚至可考慮報警。

律師梁永X指出，市民光顧政策如感到政策貨不對辦，只要拒絕進食便毋須付款，最多只需支付「淨飲」茶水費。但食客如吃光政策，無論是否有投訴，都有責任先行付款。梁提醒說，如不滿政策質素，最公平是即時為政策拍照留證，將樣本交有關部門檢驗仲裁，市民或政府用任何方法「破壞證據」後再投訴都不公平。但雙方如堅持要到消委會或小額錢債審裁處解決事件，最終可能費時失事，得不償失。

所費何幾？?

所費謂何？

所費為己

費為己有。

離開不是為了回來

把總掣關上的那一瞬, 我嘗試說服自己, “離開, 不是為了回來.”

七年, 進進出出在這棟樓住了七年. 三樓住了年幾搬走幾個月又再搬到四樓, 四樓住左兩年又搬走年幾再搬返入去住多兩年, 差唔多.

每次搬走, 總係唔捨得將間屋比返業主, 於是靜靜雞Sublet比相熟朋友. 棟樓其實無咩好, 又舊又潮濕管理又差, 但窗口棵大樹, 石屎森林中, 如獲至寶. 窗簾我都費事裝, 阻住睇樹, 無謂.

大樹奇怪, 每年都係過左農曆新年先轉黃葉, 十日後開始落葉, 試過一次幾日無返屋企但又無關窗, 返到時, 大半個廳都係枯葉. 樹上唔見有鳥巢, 但唔知點解朝五晚五都有雀唱唱唱唱唱, 由太陽上山唱到落山, 日日如是.

每次死唔願訓, 聽到雀仔唱歌, 就知到差唔多天光, 係時候上床.

守住一個地方, 原來只係為左一棵樹, 諗落都真係幾On居. 雖然曾經一度, 我自以為守住呢個地方, 因為我等緊一個人返黎- 於是個年幾裡面, 我無放過男伴入屋.

終於, 請過一個.

黎左三次.

到而家我都唔知係可喜定可悲.

當搬運工人清好場, 我望住間空屋, 不期然做左個check list, 比對下過去七年既生活, 同當日搬入黎時所期望既生活有咩分別.

唉, 都過去左, 索性close 左個chapter啦, 不如.

假如下一個搬入黎既, 又係一個廿一,二歲既妹妹, 我希望佢知道, 呢間屋, 曾經充滿住天真, 期待, 笑聲, 生氣, 眼淚, 頹喪and so and so.

千金不換.

感謝曾經係呢間屋同我食過飯/飲過酒/睇過戲/吹過水/訓過/鬧過/愛過/痛過既每一個人. 你地同呢個空間, 已經成為我生命裡重要既一章 - My 20’s in Soho, Hong Kong.

離開, 是為了開展下一章節.

另一個時空再聚, 我靜待.

給阿媽的情書

我愛你,

於是我唔在乎

你讀書成績有幾好.

你一年賺幾多百萬.

你有幾出名幾叻.

我愛你,

於是我要求自己

幫助你發展人格同心智.

只有健全的人能夠

心無所懼追探自身Potential,

從而發揮自身所長,

追逐自身所夢.

生命再短暫,

但你的行動將成為見證,

化為你對世界所留下的微小貢獻.

我愛你, 於是我自問,

我可有愛你的能力.

基本為, 當你脫軌時,

我能夠超越自己情緒,

忘卻指責, 怒罵,

將"事情"轉化為一個為學習,

引導你重返正軌.

持續引導, 為愛的基石 .

當你逐步克服弱點,

深刻地認識自己,

透切地了解生命的軌道,

你便自然會懂得

何謂愛.

只有通過了解, 支持, 信任同鼓勵,

我才會學懂如何引導

我所愛的,

你.

而因為我愛你,

是以我努力學習,

如何以我以上所寫的方式,

先愛我自己.

不可好奇沾污結尾

兩個人.
兩張檯.

十點鐘位置, 他坐.
兩點鐘那點, 我望.

等人,
三個字.
十八分鐘, to be exact.
我滿腦子想法.

The lips the hips the abs,
The touch, the position, the action.
The sensation,
intensity,

And
The
SATISFACTION.

一二三四五六七八九,
清清楚楚,
一樣一樣,
我-記-得.

撲埋去擒上去
解佢呔除佢衫
大啖大啖
咬咬咬咬咬

唔好咬死佢
但要咬開幾件
方便拎返屋企
好好收藏.

當靈魂正式
被身體
騎劫,

我竟然會
急得想哭.

咬不得,
我呷.
Pinot Grigio,
大啖大啖.

一杯兩杯三杯.
鹹鹹地味,
竟然.

不能哭,
便吞落肚.

一顆一顆,
一滴一滴.

大啖大啖.

直到理智崩潰.

靈魂合理地
被身體騎劫,

終於.

雜碎

話說某日, 我send 個Creative Brief 比阿客後, 順手forward 比女友們.

給阿客的Subject:

Concept & Profile Of Project YYY.

給女友們的Subject:

Please rate gagging effect from 0-10, PLEASEEE!?

敬業精神, 怕且我敢認第二, 都無人肯認第一.

***

跟“超時”腦震盪, 來客問有甚麼Exciting Project可以合作合作.

我條件反射地回問 “下, 今時今日仲有人肯搞Exciting Project咩 ?”

然後我又跳Fuse地問句“你印象中對上一個好好玩勁正的派對係邊個?”

當無人出聲成分鐘之後, 我只能硬住頭皮自問自答, “零五年愛迪生華懋派對都算係經典啦.”

“果個係正, 但上年個亞dee das都唔錯丫.”

“但我估我掛住既, 係當年真係好多人要Call晒contact斑Invitation個種Sensation. 亞dee das係唔錯, 但喂, 唔難去喎. 再諗下而家有幾多Brand搞個Party仲要Ngai人黎, 唉, 真係今非昔比....”

然後話題伸延到某煙草商花過百萬搞一夜派對都只得三幾百人到場.

噢, by the way, 在座無人去過煙草商的Party, 亦無人聽聞過有過咁既派對發生.
我地講起, 純粹係欣賞緊負責個間Agency有幾做到野.

***

半夜行狗, 遇上南北的美女總編. 攬攬錫錫一輪後, 她瞇著那雙殺死人的眼晴問, you are coming to my birthday party right?

我黎, 我緊黎. 望住妳呢個表情, 我捨得Say No咩? 如果妳Keep住呢個表情多五秒, 我比埋條命妳做生日禮物又點話?

然後我問, 喂, 下個月我Farewell Party 妳黎唔黎到先?

抱住劉小姐的美女碌大隻眼問: “下, 你走去邊!??!?!?!”

“Anywhere more sensible than HK.”

=>

Source

觀中女告白後之自我勉勵

(敬請留意尾段-2:20-3:25)

==============

admilk (1 年 以前)

haha, she holds the mic with her pinky up :P

Pls Shut The F*ck Up!

有時我阿婆嘮叨我:

“唉,你咁大個女, 都應該知你阿媽點諗丫!?”

每次我都心諗:
"我又唔係佢, 我點知佢點諗唶, 下話!?"

後尾我開始發現,
原來呢個世界真係
Nothing Is Impossible.

就好似老老實實講出豆腐渣著著實實有幾難啃!

(結果竟然坐五年)

又或當我國上下一心歡賀六十大壽,
原來世界各地的人也為六十而歡呼!

(之不過人地High On緊既係世界人權宣言囉.)

High 還High, 搞到好似衛焦咁返唔到歸,
就.好.很.無.謂.啦.
但當等開飯時係電視見到虎哥過家門而不入,
我不禁講左句,
"大佬, 攜帶遺禁藥物都係坐三個月咋喎!?"

(咁點解講真話要坐五年監既!?)

好彩我醒左.
呢一切, 邊有可能成真呢?
盛世當前, 呢D咁無蹊既天方夜譚,
梗係我發夢定啦!

我呢生人最大目標, 就係以最短時間,
集齊最正既四仔*.

你可以話我痴心妄想,
But I have a dream.

If a nightmare could come true,
my sweet dream is destined to happen,
some time, some day.

And when it happens,
我應承你我一定會好好諗下:
到底我咁大個人,
其實真係知唔知阿媽對我有咩冀望.

(喂, 我知, 我明喎!!! 例如我明知佢連命都可以唔要但求我長進生性唔望我做人上人淨係想我做個似人既人即係唔偷呃拐騙唔阿諛奉承唔貪慕虛榮行得正企得正既人囉.)

係咁簡單唶,
下話!?

即係我想講, 查屎呢, 我一路都係特登令佢以為我唔明佢想點,
費事佢知我明就要無得揀地跟住佢去做..

雖然呢, 佢Obvious到咁, 有時咋唔知都真係幾辛苦架...
但假如佢真係以為我唔明,
我會覺得好失望囉.

(............................................................)

Shut up, Shut up,

(Shuttttttt Up!!!!)

SHUT UP!!!!!!

(SHUT UP!!!!!!!!!)

SHUTtttttTTT UPpppPPPPPPPPPP!!!!!!!!!!!!!!!!!!!!!!!!!!!!!!!

(一直最困擾我既係,
點解會有人夠膽以為,
佢個套會work過我個套囉………..)

波波這回事...

星期五晚, 小酒吧內.

甲女: “喂, 你好嘛? 好耐無見.”

乙女: “OK呀! 喂, 我好鍾意你今日個波波, 好正呀.”

甲女: “下!? 有幾正丫? .”

(此時, 乙女已經伸出雙手把弄著甲女的一對波波...)

乙女: “好得意呀! 好好摸呀佢地! ”

甲女: “車, 你夠有兩個啦, 咪又係差唔多! ”

乙女: “但你果對軟熟D好摸D喎!! ”

甲女: “但你果個都好正好滑喎…咁…一係...交換啦!? ”

至此, 坐於甲女與乙女旁的一行八人全然安靜下來….

兩名女子終於察覺對話內容的不雅之處,

然後穿波波毛衣的痴女跟掛著波波頸巾的露體狂,

一同爆笑.

=====================

又, 想幫波波毛衣影張相以作紀念,

但一將件污穢衫攤係地下, 不到三秒...

(呢塊係!?!?!?!)

(E咦, 有波波玩既!?!??!?!??!)

(嗯, 好啦, 呢塊野我要左佢啦.!!)

=====================

波波的吸引力, 女子果然沒法擋.

願波波與我們共存, 阿門.

二月十四的禮物

Half Of An Old Paper Bag For Packaging

The Other Half Used For Wrapping & Deco

And The Present Itself...

==================================

小姨離港進修, 臨別之際, 送她一部影響我極深的小書.

雖然這Copy已被我讀得甩皮甩骨...

願她一如書中主角, 緊貼著自己的心,

活出Personal Legend.

又, 把弄完小把戲作掩眼法後, 我不其然想到:

"Don't Judge A Book By Its Cover."

嘻嘻.

==================================

祝大家虎來苦去, 笑口常開!

作為後生一輩, 最錯係咩?

最近經常問朋友: 「喂, 你有無Role-Model架?」

雖然個個咦依哦哦 , 「有既, 我估, 但一時間諗唔到係邊個.」, 但無人堅定地答聲「無」.

大概我們的身體內, 都有一只小雷達, 廿四七地尋覓可供學習用的「人辦」.

新聞報導訪問示威者, 「憤然上街, 可有作為?」, 廿多歲小妮子反問:「點解你地淨係問有無用, 而唔係問我地做緊既野岩定唔岩?」

從小村的幾十人發展至立法會外的八千人, 一路下來, 我們目睹形形式式的「人辦」- 權威面前毫無還擊之力的「人辦」, 被忽視忽略的「人辦」, 被屈無路訴的「人板」, 睜著眼睛說謊的「人辦」, 因一己之利要求警方濫權的「人辦」, 龜縮於立法局及禮賓府內的「人辦」.

當然還有勇敢爭取的, 無私的, 說實話的「人辦」.

細個阿媽鬧: 「都有辦你睇啦, 你仲點點點咁咁咁咁?」

刻下我們所做的一切, 說穿了, 不過是「睇辦」以後, 認清自己位置, 懂得心中喜好, 清明了是非道德之心而矣.

作為後生一輩,

最錯係咩????

咪就係突然「開竅」囉.

============================

又,

假如你想知道

香港言論自由之寶貴，

六四當夜的親身經驗，

城市論壇既幕後花絮,

港台的現狀與未來，

或

民建聯如何成功爭取北極有企鵝,

呢個訪問, 你一定要聽.

============================

Devil Doesn't Exisit Until An Angel Reveals.

天的一邊亦有個某某在等候

一月十六號晚的遮打道上, 躺在馬路中央仰望夜空之際, 我突然醒覺, 要靠自己爭取的, 何止幸福?

百感交雜, 不知從何說起. 先借他人好文.

暴虐不仁。自作妖孽。時運極滯。非改不可。 By Chainaw Riot

=====================

你要靜候再靜候

就算失收始終要守

日後盡量別教今天的淚白流

留低擊傷你的石頭從錯誤里吸收

也許豐收月份尚未到你也得接受

或者要到你將愛釀成醇酒

時機先至熟透

想想天的一邊　亦有個某某在等候
一心只等葡萄熟透　嚐杯酒

Master Key!?

Disclaimer:

They are not my friends.

我慶係因為...

我愛菠蘿包, 但你覺得草根野彰顯不了盛世.

我愛大排檔, 但你覺得米芝連比較權威.

我愛天星皇后, 但你覺得填海賣地最實際.

我愛空間, 但你吼我唔覺將公共空間外判私人發展商.

我愛藝術, 但你班廢柴淨係識假大空搞西九.

我愛民生, 但你覺得有錢就個個都會乖乖收聲.

我愛自由, 但你連法律本質都妄顧.

我出聲, 因為我慶.

我出聲, 因為我想對得住我父母恩師兼九年免費教育.

我未X你, 因為我仲相信理性思考同討論.

但我慶, 呢個係事實.

而我唯一希望係

你唔好逼我X你.

咪Q將高鐵話題叉咁遠啦

當色盲都分到黑同白，

個班分唔到黑白既人，唔係盲毛可以係乜？

見班盲毛渣住雞毛指鹿為馬，

我不過跟住政府宣傳廣告做：

比人侵犯，要大聲叫唔好，

再話比信任既人知道!

我而家大大聲聲叫唔好，

你話我 “激進” “憤怒”，

仲亂咁加一個“八十後”標籤係我身上，

而家係咪全部“八十後”都出黎一齊叫唔好先？

我識一班同輩，佢地好溫和，

高鐵係佢地心目中，只不過係一條類似TGV既物體，

起唔起其實佢地唔Care，但同樣票價，佢地一定會去曼谷台北而唔係北上．

又講真，要搭High Speed Train都去日本／歐洲搭啦，

話晒呀，d相呀，要post係facebook比friend睇家嘛！

你一竹篙打一船人，

有無諗過對佢地唔公平？

尤其當佢地到而家都諗唔通，

拎阿爸錢去買架M3有咩問題．

你做乜得要屈佢地係 “激進” “憤怒”“八十後”唶？

你答我，
你答我呀!!!!!!!!!!!!!!!

反高鐵，因為無法接受政府洗一大筆納稅人錢去起一條唔等洗既鐵路，過程仲要毀滅小市民家園兼順便將四十棟舊樓變為危樓．

咪就係咁，
之嘛．

See you in 2010

零九的三百六十五天中，有三百天我都在睜著眼睛睡覺的狀態，許是沒辦法中的辦法，又或是得過且過的下策，不得而知．盲目大概是生活在"盛世"的no.1 pre-requisites, 我如斯為自己開脫．

一零之始於戲院，看著半人獸的外星生物被圍剿，夜光森林被無情炮火摧毀，Waterproof的睫毛液終不抵缺隄的淚水，溶得一塌糊塗．脫下3D眼鏡後，我立即變成安安佳佳的同類．在冷清的上海街上遊走，男人笑我被荷里活下三流的情緒操控KO，噢親愛的，當無辜者於私利之前被“壯烈犧牲”，我的眼淚當然廉價得不值一文．但當想到菜園村即是港版Pandora，我又會天真的但願你我他都有勇氣成為“出賣自己人”的Jake Sully.

誰會珍惜當你還擁有，娘是娘，但今天再哼，竟有一抹蒼涼湧上心頭．

自巴塞回來後，人正式大了一歲，生命不期然進入另一階段．當一度親證年青的靈魂無奈地被困於打敗仗的肉身內，全然地失去自主，意識仍盛，卻無法表達，我不禁對自由有了新的體會　－　我們無何選擇地閉著雙眼來到世界，然後又被遺反意願地閉著雙眼離開世界，當我還能控制張合自己一雙眼之時，裝瞎扮盲或認真認清其實也不過是一個決定．

一零年，我衷心希望每個人都能看到好多好多人．

而我，則要加陪努力學習珍惜眼前人. =p