絕肉這回事

絕肉，學名為"絕對地唔食肉"

一個信奉Atkins Diet的食肉獸突然戒肉，身邊豬朋們立即開賭，賭我捱唔過七十二小時．唔經唔覺踏入第四個月，每次飯局，總有人問起我絕肉原因．

豬朋們的關心，當然要認真對待，於是我坦白地答

「Ginger死個一日，我好夜先返到屋企，但都要處理條屍架．我同張大小姐又唔想就咁dum　出垃圾桶，一來怕條屍會腐化唔衛生，二來，咁做又好似對Ginger唔住…」

「但同時呢，我地又唔肯定有無火化既需要喎．換句話說，即係我地未諗到點做好．咁經過我地詳細考慮同磋商，同意眼前首要工作為：千祈千祈唔好比條屍腐化．做到呢樣，我地就可以Buy Time再決定下一步點做．」

「咁屋企有咩係可以將條屍保冷呢？」

通常聽到呢一到，發問者都會睩大隻眼望住我：「你唔L係呀？」

唉，其實有咩咁出奇呢？我同張大小姐覺得完全係合乎邏輯同常理既決定囉．我地又唔係就咁擺係冰箱，係用保鮮盒載住，仲驚Ginger訓得唔舒服，舖埋毛巾係入面添！

「解決左眼前問題，我就同張小姐講，我會搞埋d手尾．但之後幾日實在係忙，又未諗到點處理最好，如是者，條屍就一路擺左係冰箱．」

「Anyways啦，其實都無咩大不了，平時個雪櫃咪又係雪豬牛羊雞．不過今次雪埋隻狗BB之嘛．我地仲無將佢劈開一碌碌添！」

「但衰就衰在，我每晚都要開冰箱兩三次偷Belvedere飲．咁每次開冰箱，我就會諗起：丫死啦仲未搞掂Ginger條屍喎．經過幾日既聯想練習，我開始將雪櫃同屍體劃上左等號．於是呢，我就決定絕肉啦...」

咁當我解釋完之後，通常d送就開始上檯．但唔知點解，發問者聽完我既小經歷之後，通常個餐都唔會點食肉．

喂，咁即係同我爭菜食唶！

所以而家我學精左啦．當有人問起我點解絕肉，我會答
「嗯…因為我唔想食自己既同類．」