Thursday, March 12, 2009

實情...

我對朋友說;「游水,其實我可以游得比Phelps還好.」
朋友不信,我大怒,衝口而出的罵他:「小你,做朋友都唔撐我.」

實情係,我成世女連水都未掂過.

我對男人說;「我會好好待你愛你.」
男人不信,我覺被拒絕,受傷下罵他:「你這個人渣,為甚麼不好好珍惜我?」

實情係,我連咩叫珍惜都未搞清楚.

我對家人說:「我會爭氣,以後會好好做人.」
家人不信,我覺被低估,不屑地罵他們:「我想要去做的事,你們懂個屁?」

實情係,我連自己想做乜都未知.

實情...

Wednesday, March 11, 2009

妹仔大過主人婆

上星期Agent話有間正野,我八掛,佢得閒,於是明知租唔起都去睇下.
唐五樓連天台,五百呎,月租三萬二,即呎租$64.

自零三年興起以平價掃入唐樓,換上靚裝翻新,再以天價租出.至今中環唐樓起標價為30蚊呎.

舊山頂道曉嵐閣,十二年樓,都係每呎租$30.
但三萬蚊,可以租到九百三十八呎單位.

* * *
心浮氣燥,寫工作電郵時,戾氣終於失控爆發-

Let’s not struggle on whether (your action) is ethical or fair and look at the reality: the contracted numbers was an optimistic estimation as of November 2008 when HSBC stock price was at HK$100. With the stock currently trading at HK$37, please excuse my bluntness for saying: your figures are not realistic at all.

On product sponsorship, as I previously said, the (product) you proposed will very likely remain as dead stock in my storage room. Is there any chance you could replace it into something actually sellable like xxx or yyyy?

一口氣的打好,Proof reading也沒做便按下Send.
收信人:零九年最闊綽的士幫灑

* * *
早前與Mr Z吃飯,大小煙燦碰面,遇上雨天,要找個靜靜地抽得煙兼好食的室內地方,想不出之餘,更沒耐性細想.既然是為答謝Mr Z 義氣地拔刀寫文,如他無懼食物中毒,不如由我下廚.Mr Z藝高人膽大,更自薦擔起買酒之務.

平日煮開番邦野食的我,抽起條根好想食蝦仁炒蛋,於是另煲了花旗參湯,順手炒多碟蜜糖豆百合雲耳,煮了一頓味道食材賣相都普通到喊的飯仔.

但佢帶黎既酒係 >>>

Tuesday, March 10, 2009

Generic Strategies Of...

The Playboy-Wannabes
妳問他職業,他嘻皮笑臉的叫妳猜.
妳問他嗜好,他說認識你是近年最有趣的事情.
妳問他理想,他說從這刻起添了一樣,那是好好的了解認識妳.

The Players
妳問他職業,他平板地回你行業所隸屬的界別.
然後反問妳工作上的甜酸苦辣.

妳問他嗜好,他大路地回你最通常跟朋友見面聚聚.
然後反問妳週末通常玩甚麼做甚麼.

妳問他理想,他感慨地話太遠的不敢說,但朋友逐個成家立室,最近開始思考Settle down的問題.
然後反問妳對婚姻孩子有甚麼看法.

The Game Planners
妳問他職業,他淡然地答:是一個會令你這類型的女生感到悶蛋的行業.
然後妳疑惑地問他:甚麼是我這類型的女生?

妳問他嗜好,他誠懇地答:最近開始讀點歷史,因年少時犯過幾個本應可以避免的錯,現在希望學懂從別人的經驗中學習.
然後妳心思思好想知,他倒底背負著如何的一個過去.

妳問他理想,他帶點害羞地說不敢想那麼長遠,目前對自己唯一要求,是先戒掉某幾個累人累己的壞習慣.
然後妳征征的望著他,猶豫著好不好讓他知道,妳很想繼續聽下去.

And the rest of guys….

妳問他職業,他禮貌地答卡片上的職位名稱.
妳問他嗜好,他禮貌地答益智健康的體育運動.
妳問他理想,他禮貌地答希望三五年內升至某個位置.

Monday, March 9, 2009

I blame the dress

總是被帶點怕羞的男人吸引.(OK 我唔否定我嚇驚他們的可能性) 但有時約會了三五次他們還未敢牽我手吻我臉,心裡媽媽聲之餘,亦會強烈懷疑自己的吸引力,因而深陷於不安之中.

理論上,假如男生喜歡你,你穿甚麼他也照樣喜歡.又理論上,要引起男人獸慾,有咁低胸得咁低胸,條裙有咁短得咁短,再著對四吋高Platform,應該搞得掂(成).但我非駱克道企街,更不希望他對女人的鑑賞力跟嫖客相近.

我喜歡以裙子作試探之餌,假如能夠順道帶給他丁點感觀上的衝擊,更好.

視覺:露得多,未必好.裙子的前裁,應以突出女性曲線為主.當然,我沒有完美的S型身段,必要時,我會借助肚箍腰封瘦腿絲襪高跟鞋幫手.反正那一夜,我也沒有跟他玉帛相對的打算,呵呵!

觸覺:裙子的質地,自己喜歡Satin / Nylon / Silk,鍾意佢夠Smooth嘛!終極目標為,他會將裙子的幼滑質感,跟我的皮膚作出聯想.

臭覺同味覺,我會選傾向甜膩的香水.點解呢?因為我想令他覺得我好好味,好想試一啖囉.

聽覺呢,就應由自己Offer給他.工作煩人,時事政治敏感,人生大道理又太艱深,所以我通常會引他講講十幾廿歲最Care free時的事情,keep the mood light & happy,然後乖乖坐定做個聽眾.

當然,再數落去,眼神/聲調/動作都有得Work on.但當有一個男子,可以逼到我要借用裙子的威力一探虛實,見到他之時,我實在已經Lum Dead了大半, 眼神/聲調/動作反而通常出賣太多心意囉.

Whatever happens, happens.
But I always, always blame it all on the dress.=)

* * *
此文寫於宅女的新衣之後,一直掙扎著好不好發.不是怕揭多隻底牌給你們看,怕只怕裙子觀眾識穿了我的不軌意圖,鬆毛鬆翼沾沾自喜.無奈自己實在心癢手痕,也想聽聽各位高見,於是呢,我又去試探裙子觀眾對我這個裙子論的反應.

他斯斯然的答我:「怕咩比我知?你引我,我絕對應該受落.你花咁多心思,我仲應該受落d添架喎!難道你寧願我唔受落?」

佢呢個答案,我會記住記住記住.以後就算再擺明特地為男生打扮,要切記123:一,別要去得太盡,要為自己留返一手.二,比平日靚兩成到好了.三,不要再讓他知道任何有關衫褲鞋襪的歪理.

不然呢,他會當著你面寸嘴的.

* * *
我呢,真是好很愛我的裙子鞋子!(好明顯啦下話)最近跟裙子觀眾見面,心底內仍然激想首映藍裙子,但呢,又唔想比佢估得中喎,呵呵呵.

於是挑了這條看似平平無期的黑裙 (係呀又黑呀宅女係得一味架咋),近日由UPS空運抵港,一穿上,Cutting與質地絕對地物超所值,令我喜歡得不願脫下!(Sorry 我親愛的E71影相真係得到呢...)


著左上身,應該係咁...


那夜的化妝及髮型呢,我是完全Brainless地照Dup 的!我估計裙子觀眾見到此張原裝圖片時,一定會大大聲的嘩出黎...







嘩,乜得你咁糟蹋條裙子? =p

Sunday, March 8, 2009

歡場無真心?

年前跟一位新相識約食飯,電郵五六回,他用上三個不同的電郵地址.

我心想:「這人,小古惑!」

俗語云狡兔三窟,不是沒有道理的.

日常通訊聯絡,我用五個電郵地址,兩個FB 戶口.電話號碼,曾經也有兩個.
地址,又有三個,家,有兩頭,但隨時興起可以住上三兩個月的地方,又有八至十處.

信唔過,一直是我最強的優點.我甚至曾經刻意訓練我媽,不要將任何期望投放於我身上.我唔想為滿足任可人期望,勉強去做不想做/不喜歡做或沒打算做的事情.當然,對在乎的人,有時候我也願意在可接受的合理水平內,應酬一下.但同時我會Make sure 他們Fully acknowledge我刻意地討好/迎合他們的Effort.

喂,我交足戲比你時,你都拍兩下手掌丫唔該.

總覺得想生活開心好玩,真心是先決條件.真心撻著熱誠,熱誠又辣著愛,愛又燒到過專注.這團小火,最好越燒越旺,最好焚身!

早幾天想在C+ Musica放午夜情,但一聽到「歡場裡無真心」那句,我爆笑了出來.

喂,我真心地跳緊舞架喎.
喂,我真心地享受緊同朋友仔發顛的每一刻.
喂,我有半數Close Friends都係歡場內玩玩下識返黎.

甚至連我的裙子鞋子,歡場以及相關品牌,經年地直接間接地資助了起碼七成.

我真心待歡場,歡場就會真心待我.呵呵我信架!

之但係,世事當然無絕對.有時候,你必須違背真心.

例如,一個你好想跳舞極需要發神經的週末,你過去現在未來的約會對象們,逐一現身於你最喜愛的歡場內.而同時間地點,還有你拒絕過喜歡過的甲乙丙丁茂.另加上數個擱在On Hold Status未處理的ABCD.而他們當中,甲丙丁跟BCD又是Miraculously地是認識的.

任你如何真心想跳舞,真心想跟朋友仔發神經,真心愛此歡場,你也必須違背自己的真心,以極速逃離現場.

回家途經其中一個「居所」時,你突然好痛恨自己.











DLS 你做乜Q野淨係蒲果個場!?!?!?!?!

Thursday, March 5, 2009

Overcooked 之 C+內情

如果一定要係麵包同愛情二選其一,是但揀一樣我都無所謂。

以我性格,我絕對唔排除人老珠黃時,兩樣都無。所以一諗到:「如果兩樣都無,我係咪呢世都唔會幸福快樂?」時, 我發現,「自己」先係最緊要。

失去自己,Insecurity自然而生。當每日活於憂慮之中,驚衰佬偷食,怕阿邊個想呃自己錢,心難安夜難眠,幾多錢或愛情都彌補唔到。

又,都叫做左人一段日子,我信單方面去Take人地比既野,佢唔單止隨時伶得走,將來亦一定要還,而且D息口仲分分鐘高過貴利。

所以,揀乜都得,前提係,唔可以要我放棄自己。單身呢兩年,其中一個學習重點,就係感情上自給自足。幸福快樂,唔應該靠他人提供。學懂令自己幸福快樂,自然可以感染到身邊既人。

唔扯咁遠,返番去愛情麵包呢個問題。問題係,問題本身就唔Make Sense。

首先,發問者將個context predefined左為我想係佢身上得到某種東西。喂,錢我都識識地賺,愛又唔係淨係佢先肯比我,Counter offer,我唔一定要Accept唶,下話?

再黎,點解局限左我只可以係愛情麵包二選其一?我要愛,但唔限於愛情得唔得?我要錢,但如果錢會令我出賣朋友,我可唔可以揀義氣?又或者,娘d講句自由價更高,佢又奈我咩何呢實在?

唉,所以話性格主宰命運。我向愛情麵包兩空之路,又邁進左一大步。

另,雖然原則上,愛係無國籍顏色之別,但我絕對係港佬Fans!之但係遇著呢位港佬,我實在有幾秒想爆樽囉。

拿,所以我情迷拉丁男,好明顯係被迫架!=))))))

================================
好快講兩句,煙稅加五成,我地都繼續照食,係咪証明到我地食煙既堅定決心先?咁當我地被逼企係街邊打邊爐時,途人可唔可由於我地對尼古丁既忠誠,加兩分尊重係d兇狠眼光入面?

Wednesday, March 4, 2009

Well Done 之 C+自白

年半前,有人一副講數嘅面口問我:「講,你要愛情定要麵包?你講丫,你講就得架啦!」

我呆一呆,個腦自動進入公事模式,為娘爆嘅問題,尋求最適合嘅娘爆答案。但見佢一臉認真(好似),我實在唔忍心敷衍佢。如是者,我坐係佢對面,自顧自的二零零七太空漫遊:點解從來無人咁問過我呢個問題?又點解做左咁多年人,都無問過自己呢條問題?

然後佢企起身,著返件西裝縷,走過黎錫左我額頭一啖,再拋底一句「慢慢諗,諗到答案,Call我。」

* * *
唔忿氣被一個娘爆問題難到,and so my obsession began.

於是衍生出一系列問題:

係咪每個人都有個價?
到底要幾多錢,我先會放棄愛情?

到底要幾多愛,我先會放棄好多好多錢?
又到底要一個點嘅男人,我先會可以徹底瘋狂地愛上?

兩者係咪真係唔可以共存?
我可唔可以要少d錢,要少d愛,但要幸福快樂?

點解我從來無諗過呢個問題?
我到底知唔知自己要乜?

如果兩樣都無,我係咪呢世都唔會幸福快樂?

* * *
諗左年半,呢幾日我突然好想打電話比佢。

我未必會話佢知我呢一刻嘅答案,但我一定要親口多謝佢曾經問過我呢個問題。


"Freedom is not the absence of commitments, but the ability to choose--and commit myself to--what is best for me.
" Zahir - Paulo Coelho
==========================
PS1 (恭喜好友D榮升老豆,呢篇文,我希望令千金成人禮時,可以送比佢!!)
PS2 (C+小實驗十二碼撞柱,唉,咁即係仲寫唔寫總結好呢!?)

Sunday, March 1, 2009

搶博十六點

我,俗不可耐,身邊豬朋,當然是俗友。當年決心「學做人」.一覺醒來,突發現自己獨處火星,怕孤獨寂寞,即以極速逃回地球。回到地球,又受不了污煙瘴氣,拔足跑回火星。前後來回了不下百遍,心難安之餘,更深感困惑:做一淌混水,手到拿來,安樂自在;如今奢想做一淌清水,貪莽乎?

信相對,不信絕對,寫文,漸成每天的思考練習。於不寫硬道理、不評論對錯兩個前提下,如何才能謹慎之餘,坦白正確表達自己的看法想法?自己又是靠把口找兩餐的人,寫文的時候,不如也借此練習Presentation Skills,試試不同的表達形式。

學情緒管理,所以不寫負面事情、不肆意地發洩情緒。自己所定下的底線,總得堅持。再想吐一口烏氣,也只好翻來覆去,左扭右扭,就算不能將之魔幻地變成好事,也總能從多幾個觀點切入,將一件壞事,轉化作平常事。

又,當一切依「相對」為原則時,定了「底線」,也得定一條「頂線」。

曾得高人提醒,火星,不是逃避之境.想要移民,總得先結三數位火星之友。你們來讀文留言,不是老馮的。發文,最好每篇都是徵友信.不論你在地球火星冥皇星,來來來,我們談笑好分享好交流好互罵好打架好,當交個朋友好了。

有「底線」,有「頂線」,亦得定一條「平衡線」。

交友,緣份以外,還得加上業歷;發展友情,又得悉心栽培灌溉。以文會友,談何容易。我寫博,不過是「學做人」的小練習,能夠順道當成Message In The Bottle,樂事也。有幸給你撈起,純屬緣份。我唯一可以做到的,不過是下筆之時,緊記善緣二字。

但我視你們的署名留言為回信,總不算妄想症病發吧?

==============
由於本人發雞盲,以為今期(1/3)兩週一聚題目為<我博十六點>,原來是幻看,該是下期才對!唔打都打左,現文照發,15/3另打一篇參與兩週一聚吧!
 
Clicky Web Analytics