兩周一聚(21): 重頭一次

上星期，媽說：「你無乜好，唯一好在，你永遠知自己有幾衰．」

我立即爆笑到收唔到聲．

知自己有幾衰，同知自己衰咩，是兩碼子的事．知自己衰咩，尚可是獨立事件，偶一不慎的犯錯．知錯能改，修正錯誤後，又是好女一名．知自己有幾衰，換句話說，就是「我就係咁架啦，咁點丫？」的態度．絕不認錯，極其量只願意承認跟對方之間，出現了觀點與角度上的分歧，又或因溝通不足，導致對方投射了某些主觀意願於我身上．

「對於發生既一切誤會，我實在非常之極之抱歉．我尊重你認為我錯的權利，但同時，我亦懇請你諒解我堅持無錯的原因．」

（OK，到今日我媽仲未親手鍊死我，我只能夠講句，母愛，真係世間上最偉大既愛．）

於是有時，為左証明自己ulimately無錯，明知行錯左一步，都會硬住頭皮繼續行落去．

「我衰左三年, 我等一個機會, 爭番口氣, 唔係要話比人知我威，我只係想証明呢個世界有多過一種做事方式．我發過誓，唔會再比人拎支槍指住我個頭，逼我做d我唔想做既野！」

但有時無論我點硬頸，錯左，就真係錯左．就算宋世傑上身，戾橫折曲，拗足三年零八個月，死左，其實係唔會拗唔番生的．

「你睇下你自己似咩？睇下你自己似咩呀!你有爭取機會咩？你無，你無呀！！我唔想學你咁...」

到呢個時候，已經唔係認唔認錯既問題，因為我已經企左係掘頭巷既盡頭．而我，到底重可唔可以走返去當日個條分叉路口，重頭一次？

「你過黎！！你睇清楚，呢個係你自己黎，無論你以前做錯乜野，你都還返晒比自己啦．自己有勇氣去改過，點解你無勇氣接受自己？點解呀？？」

重頭一次is going to take loads of courage and hard work…
「咁就驚啦？你點同我玩呀？」

重頭一次，what if things still go wrong?
「賭博都有輸贏．」

重頭一次，is it really possible?
「神都係人黎．能夠把握自己條命既人，就係神．」

呢一刻, 我只係衷心希望，當行到返去分叉路口時，能夠遇上堅叔．

（又, 重頭多幾多次, 我都一定會揀返呢個阿媽.）



===========================
兩週一聚
09年9月15日第廿二期
重頭一次