This August

1) 無3P無泳池的生日，但有3陪：陪飲陪食同陪玩。但有人出場地食物同酒水玩足5晚呢件事就...於佢連入錶都包埋之後，就已經變成無得計了。

2）點樣可以連續食足10日，係無得解釋的。而1個星期7日可以打8次邊爐，係技能來的。想提升技能的話，可以約我。

3) 我生日，有人請我飲同食；但有人生日，都係要請我飲同食。對於返嚟香港14個月後享受到「公我贏字佢輸」嘅滿足感，本人表示感激。

4）係天台屋時，有人唔知講咗句咩。我話：「呢度廿五樓來的，你講嘢小心啲。」佢答：「我咁好打，你郁我唔到嘅。」有時，好掛住抬槓。而，除咗文友之外，我把口好少會放肆到咁嘅地步，例如警告個可以送我去坐監嘅人小心講嘢。

自由。後來佢問我，到底我有無外國護照。我笑住話我有BNO。15年後先出現呢個轉捩點，我唔知佢想唔想為一齊飲返啖。

但唔知點解而家警告啲男人時，佢哋居然已經唔怕我！（哭）

5)  講起抬槓，我心底嘅嬌呻，一向只會對幾個人發得出。年頭見面時，呢位大哥都以為我只想開口投訴。我嘆咗口氣，唔理佢，繼續依自己嘅英文應對。

而咁多年，我無懷疑過佢咩都明白。但佢可以逃避80後一向呢種取向：受惠過於相對公平嘅體制後，如果既得利益者係必然會維持自身利益時，會蓄意破壞所認識嘅體制嗎？

半年後再見面，佢自稱Chinese Man。我笑咗。餐晏，當然又係一堆喜劇文本。

但始終都想講多謝。因為每次佢都係百忙中抽閒，然後又扮唔趕有時間可以慢慢。

呢啲，係唔係傳說中嘅遷就？

6) 講到遷就，出嚟坐枱呢8個月，有人真係好似emotional animal咁持續支援。總言之，買早餐，入錶，買餸，托酒，安排地方仲要出埋朋友，每星期周而復始。而我始終似一舊飯，仍然奉行食不言枕不語，平日一般做到凌晨。當有人行動不便，係三號風球吓，放工都仲過海買陳儀興呢啲壯舉，本人表示無話可說。

因為以我嘅arrangement，應該係令到對方最舒服先啱的。

但由於要維持坐枱，我所有首要都係要維持Productivity。而如果咁都唔算自私，就當然係有人願意體諒。

7）原本想請人飲麵豉湯，但最後，我請咗佢食芝麻沙律醬。其實我食嘢好簡單，份人都係，例如始終唔想有個笑容跌咗落地。如果曾經有令佢失望，我希望佢諒解呢個唔我目的。雖然歷時經已10年。

8）而有時，無論係10年，甚至係10嘅兩次，或者一半，多謝各位仍然容忍我唔相信人同人之間有錯配。某人一動腦寫文，仍然會叫我出神。某人一面對盤數，就會叫我留意佢髮腳。誰人一開口，就自然會叫我無憂，而某人一聆聽，我就會笑逐顏開。

就連出嚟坐枱，老闆一手英文筆跡秀氣，打波游水鍊車瓣瓣掂，最近仲話佢鐘意士碌架。

男子嘅美態，仍然叫我目不暇給。

某時係香港，人同人間係咪有「路」先係最實際嘅時候，我其實在乎對方係咪「好睇」。而去到我呢個年紀，已經要係「好睇」前加上「仍然」。 

7) 承上，一如拍攝要有對焦距離同光源，由於想睇到佢好睇嘅一面，所以通常只能夠坐係對面。作為一個失敗嘅劇作家，我通常都忘記咗將自己擺埋入個畫面。於是，有時我覺得我係個好失敗嘅女人。男人送到上門，我都只會畫2A級電影。因為我自己一個時，我只會畫卡通片。

8) 有人見到我自己湊自己幾個鐘時，居然去買puzzle玩，佢即刻問：「你好悶呀？」我搖頭，然後指住個盒：「個3D Puzzle係比8歲或以上玩㗎。」後來，佢見我咁都要睇說明書，就開始疑惑於我智商。但到最後，佢都係忍唔住搶咗去玩，示範說明書係唔需要睇的。

我當然欲哭無淚：理解咩叫說明書係我工作範圍。

9) 執著於說明。由包裝到工具到物件或電器，甚至護膚品，我歇斯底里哋疑惑點解廠次次都比啲過百頁嘅使用指南。而我，睇到去coding documentation，都未試過lost都去呢個地步。

而呢個係我每一日嘅實況：遭受智商嘅挑戰。

10) 都當然多謝女孩子們。咁多年我持續低能，有時真係好難理解大家嘅狀況。咁多個當中，始終都係我最豬。閒時出席率低不再話下，但有好食嘢時，大家都記得預我一份呢啲，簡直就已經係義務社工行徑：關懷隱蔽中年。

最後，八月仲有6個工作天，而我手上嘅 projects去到5個。我開始唔知點面對。

原本計劃收埋自己3個星期，應該可以清得到，點知，係收埋自己嘅第一個星期，就多咗2個項目。其實我真係想咪埋係被竇，直接啟動逃避模式。

而其實，我唔知係咪我工作能力好低。如果有人知道個包辦graphic design, web design, web development, marketing, product evaluation, branding development, business development 同sales嘅人，仲可以manage埋production schedule嘅人，唔該通知聲。