Thursday, August 27, 2009

介紹城中勁正腸粉同粥

一名才俊阿直,帶一中一嫩靚女去舖頭仔食飯,見個中女wea口wea面,即以專家口吻講下呢度d粥有幾咁正,而佢識得欣賞,又係幾咁夠勁.兩位靚女又係呀好味呀比兩句意見附和下.靚中女見阿值好野留比自己食,即刻抖下阿直,阿直只好拋兩句書包,再借d易走入人地廚房,以示自己同老闆相熟.

老闆娘好心教佢整腸粉,叫佢鋪塊布係蒸爐上面,但條粉腸又無心機,張布都未孟直就擒擒青落米漿.「哇,乜咁熱既!?」(阿大哥,水要幾多度先變成蒸氣呀請問?你唔係諗住個蒸爐唔熱丫麻?又,腸粉唔係用手做,可以用咩做呀請問?) 唉, 阿老闆娘又係既, 人地只係想擺下款扮下型霖下女, 明知蒸爐熱,捲腸粉又要技巧,點解捉住佢手教左佢先呢. 亂咁整完, 一伶上檯,阿靚中女即刻變臉,心諗「你唔係叫我食呢兜野下話!?」.為求自保,即刻dut句「咁你整既我唔食啦」.咁又難怪靚中女,個兜蝦米腸,d蝦米多到好似芝麻餅上既芝麻.一碟原本應該白滑誘人的腸粉,化身成一艘輕舟,停泊於豉油湖之中央.換轉係你,你敢唔敢食?食完仲一定要讚好味喎!

面矇之下,才俊阿直唯有執返ja沙答句「車,我自己食之嘛.」跟住以嫩口靚女帶路,笑笑口講下呢度d野大件夾抵食,之後賣下口乖讚下阿直,點知鞋油落得多得濟,嚇到連見慣世面既靚中女都忍唔住嘩左聲出黎.阿直雖然口講唔受,但終於有位落台,條氣順返,又情不自禁講句「呢餐我請!」

嫩口靚女精乖伶俐,即刻識做講多謝.但靚中女心諗:呢條整腸粉都核突過人既粉腸,洗百鯪蚊就想學人扮型?無野呀?心有不甘下,又忍唔住頂句「下,呢餐我諗住請架窩.」但條氣都係唔順,再對嫩口靚女講句多謝.死都唔肯比阿直型!

嫩口靚女唔知真天真定假天真,完全唔覺自己被靚中女過左一棟.才俊阿直見靚中女不知好歹,眉頭一皺,又唔好意思兜口兜面還拖,有樣學樣借嫩口靚女過僑,叫佢埋單.

然後,係唔知邊個埋單情況底下,城中勁正腸粉,介紹完畢.

===========
這是我從三色台飲食節目中領悟的所謂優皮生活.
http://mytv.tvb.com/foodandtravel/eatingright/8766/1346#page-1

6 comments:

Anonymous said...

哈哈...細路女,

有條咁直嘅粉腸既, 不如下次建議去地踎館踎下, 炒翻幾味飲幾三蒸好過啦 !

食飽飯撩僅牙嘅神秘大叔

浪子m: said...

what an observation

果然係女人

荒木茂 said...

本來一個無無聊的飲食節目,經你這樣演繹,可看性大大提高。XD

L L said...

哈哈,桌上招來招往,鼓角相聞!

其實咁嘅飯(粥)局,好無癮啫!

荒木茂 said...

搭多句咀:所以嫰口靚女嫁得出,靚中女就....

hystericireul - 鄧景 said...

粉腸介紹腸粉,此相得益彰也。

 
Clicky Web Analytics