Medium Rare 之露三點? (By Mr. Z)

(C+後記請見Comments)
週一晚上，收到「禮服蒙面俠」 (Mr. Z) 傳來的文章，C+大怒，即時以電郵開火．
「做乜Send比我？講左星期五我會出篇預言，估你講乜先家嘛！我實忍唔住偷睇啦而家．哼哼哼！」

禮服蒙面俠沙塵地回一句 「Your rules not mine loh!」

C: 「點解你咁衰，要破壞我定嘅規矩？」
Z: 「C小姐，妳話已經寫咗篇文，估我寫妳嘅三點．但又唔披露得俾我知，只會同步登出。雖然妳用英文 three points，但我諗黎諗去，點解只係三點，而唔係三點式？又點解唔係兩點或四點呢？」

C: 「喂正經d啦，我咁有誠意請你寫文….嗚～」
Z: 「咁我好正經地做個比喻：錢鍾書太太楊絳細個時，有位勞神父解釋伊甸園故事，話亞當夏娃受不住誘惑，食左禁果；之後勞神父送左一盒野俾楊絳，叫佢千祈唔好係回家途中打開。楊絳望住盒禮物一整日，返到屋企仲要拆開十幾層花紙，先見到一盒美味朱古力，之後仲要送俾父母。雖然只係短短一日，但佢經歷嘅內心掙扎，可想而知．

而妳要我等幾日先知妳有幾了解我！? Better kill YOUR FUN right here right now! 」

C: 「OK，當我自己拎黎衰啦．但由於時間關係，而你篇文又實在太爛，麻煩快d入正題好嘛？」
Z: 「講妳…有d難度，尤其我完全唔了解妳．從網上睇咪一個性格鮮明嘅女子、好多古靈精怪主意、又highly opinionated、吱吱喳喳多多意見、同埋quick-tempered囉．之後發現妳原來係獅子座，咁no wonder la！

唯一睇極都唔明．《宅女》或 《宅性不改》點解？不過，網上personna根本係虛幻不實，只係我地希望人地點認識自己，疑真似假，耐人尋味！」

C: 「車，呢D唔洗你講啦．講見面之後啦！」
Z: 「我覺得性格剛烈嘅背後，隱匿著無限嘅温情．你就好似披着獅子皮嘅貓仔，扮完魚蝦蟹之後，又會用温柔嘅眼神望住人，好似叫緊人地 “Scratch Me”！但跟住又失驚無神張牙舞爪，再一啖咬落去！」

C: 「貓仔！？仲要係一隻妄想被害嘅貓仔？你找死？」
Z: 「車，你叫我講真話嘛！又唔係話怪你，我地做到嘅嘢，同我地想做嘅，一向都唔成正比；而我地要嘅，同最後得到嘅往往唔同；這就是人生的矛盾！

例如因為怕情傷，變堅強；因堅強，變獨處，因獨處，更堅強！但之後，可能更惆悵！」

C: 「你又開始玄啦，有咩快d講埋，等大家有得收工啦！」
Z: 「Overall，我覺得港女或宅女或叻女，不過係public personna；正如有些網主寫愛情寫男女關係如數家珍，有如當代南宮夫人，到有朝一日你睇明佢嘅人，發現佢比酸葡萄更酸，又比中藥更苦澀，你只會覺得文字係欺騙人嘅遊戲同工具。」

C: 「哼，咁你係咪覺得比我呃左丫！？」
Z: 「Let’s put it this way, 人根本就係喜歡同甘心接受他人欺騙嘅動物！所以我熱切期待張愛玲新書，由佢自己寫關於胡蘭成之戀…」

C: 「仲有無呀， So Far你都係同一個Point到兜圈咋播！」
Z: 「當妳一提到Three Points，我已經淨係諗到三點式.．我估只能通過更深入了解，尋幽探秘後，先能夠描繪出另外兩點！對唔住，我投降了！」

========================================
C+補充
點解我叫佢「禮服蒙面俠」呢？因為年初見面之日，除左佢英文名、手機號碼、博客同電郵地址，我對佢一無所知！但當佢揭示真身時，我第一個反應係：

嘩，乜得一個咁嘅猛人，會有閒情讀我嘅痴女夢話！？

咁到底有幾猛呢？Et…學貫中西，引古論今，出口成文，縱橫商法政界；另加細心體貼大方，仲有把好好聽嘅聲喎！哇，仲唔似「禮服蒙面俠」！？

至於點解佢擔心「人身安全」?

咪就係因為佢，令我決定暫時唔再見博友．一來，你地水平高到咁，我無謂出黎獻醜．二來，見面之後，佢由日日睇我個博，變成耐唔耐撞岩得閒先睇囉！

但呢個人，搞Wang個Party不特止，仲死話諗唔到其餘兩點，從而逃避證實C+係咪如花或爛口妹，又唔分享下當初點解引到宅女豁出去現真身．

係呀，最衰都係佢！鬧佢打佢開佢拖啦，唔洗同我客氣喎！呵呵！

(C+後記請見Comments)

Bloody Rare 之C+2D （By卡臣)

(C+ 後記請見Comments)

應電郵之邀，寫一篇對C+的感覺，我回信：「吓？我倆未見過面，只以文會友，我都係靠去認識妳咋喎！」C+答：「OK！我正要這感覺！」好！我嘗試組織一吓對C+的感覺，（大部分只是我對她的主觀投射或片面猜測，應該跟現實的C+有所出入）。唔介意的話，讓我呈現一位2D（唔立體）的C+。

C+番書妹？
我最羨慕能操流利外語的人，尤其是英文或法文！（苗族話和藏話則次之）。C+能操一手一口純正英文，她有些posts用英文寫成（仲要查字典先睇得明嗰隻）。嘩！會考攞A無難度。羨慕之餘，教我不敢在她面前亂用英文，驚港式英語露底！貽笑大方。C+如果唔係ABC、就一定係番書妹，總之黃皮白心，揸筷子唔正宗、打死都唔會食鹹蛋四寶飯。

C+蘭桂坊？
對ABC和番書妹的投射，就是愛泡蘭桂坊！C+有文章講自己穿Sexy吊帶小背心，去跳舞飲酒，又放自己抽煙的型格照片於blog上，嘩！C+一定好愛泡、好玩得、好蘭桂坊、好開放的半唐番！但C+話自己唔泡、好宅女、唔開放，仲單身了兩個年頭！哼！咁講，無非都係唔想引人遐想，惹來狂蜂浪蝶啫！

C+靚女？
我跟幾位網友曾提起過C+，都異口同聲話C+係靚女，唔係「少女十八無醜婦」的OK，而真係靚嗰隻！但其實從未見過她一張正正經經的大頭特寫。最近見到C+的Fing頭黑白藝術相，嘩！進一步confirm C+是五官輪廓精緻，計我話：C+是型多過靚，「型」是犀利過「靚」！靚可以後天人工整，但型不是模仿或學習得來。

C+錢？
我記得在文中見過C+年少時的騎馬照片（不是Osim騎馬機，是真正馬術），C+住中環、養有幾隻愛犬，有錢又有品味，飲的酒、穿的裙與鞋；目不暇給。嘩！父母一定大把錢啦！好似電視劇中的任性大小姐（請刪除『任性』兩字）。C+聽到後，一定會义起條腰大聲反駁：「大把錢？大把錢我就唔使做啦！」哦！明白！扮打工仔，驚俾人綁架吖嘛，有錢人的苦況我明嘅！

C+女豪傑？
如果C+活在50年代，她應該是行俠仗義、劫富濟貧的女黑俠，C+不平則嗚，我行我素！唔係任何女仔食煙都會食得型！C+必是其中佼佼者。C+自認講粗口，咁就同我啱傾啦！唔使就住就住嘛。我主觀地覺得C+應該有紋身，紋了什麼圖案？紋在什麼部位？我不便公開我心中的答案。

C+範數多？
C+作為「夜冷店店主」，洗地抹窗、售貨收銀、入貨散貨，乜都要掂吓乜都要識做！人面廣、識人多，好正常唶。去到啲天光墟或回收站，應該打招呼都打到手軟、笑到牙骹都緊埋！但C+話自己唔泡個d地方喎。吓？乜有I.T.人可以見到電腦而唔Check email咩？

C+愛情觀？
蘭桂坊ABC喎！係咪好易上呢？哼！C+話寧缺勿濫！寧願單身都唔隨便發展一段關係，嘩！乜做人咁清醒嘅？！我只會歸納她為眼角高，未遇到一個能100%令C+心動而已！（好似提過有吖）咦，C+話有咬男友的習慣喎，我諗她的前度，呢一世都會記得C+這位動口又動手的性情中人。

表面證供

以上純屬本人的片面感覺，可能跟真實偏差甚遠，但唔緊要！我而家好似打緊桌球，set緊「士碌架」給下一位C+朋友，續寫他對C+的感覺。他可能會將我的表面證供推翻再建造，抽絲剝繭，呈現更立體更3D更imax的C+。

送給C+

卡臣

(C+ 後記請見Comments)

想要幾成熟？

近幾星期，不寫文那天，混身不妥．思前後想，發現中了博毒．癡女說夢話當然暢快，但你們留下的片言只語，才是令我上癮的主因．而我也開始持熟賣熟，連找裙子上街這等瑣事也鋪張地發篇文．

親愛的，如此下去，我大概會連今天便便了沒有，也向大家報告一番．也許你們會好．喜．歡．看，但做人，要學拿起，更要學放下．

學懂收放自如，才能肆意的遊戲人間．

在今日的市況下，還有機會讓俗務纏身，人再懶散，也得珍惜把握．不然上天大概會先以雷劈之，再要我餘生瞓街拾荒． 這麼大一個人，時間，總能夠安排．沒有時間做一件事情，不過因為未夠想做．所以總括黎講，我只係

想偷懶！

可我這人實在貪玩．自己偷懶，也以麻煩他人為樂．本打算找幾位朋友仔現身說法，談談我一蘿子的仆街事，給他們一個機會，証實同我做朋友，有幾難受，而他們，又是如何的偉大．

但思前想後，還是不夠好玩．那不如請來三位人兄，全熟，唔熟再加一個半生不熟，試試能否撞出刺激的對比！

未來一星期，本博將由以下三位猛男代C+執筆

Bloody Rare 之 C+2D
打頭陣的，有破例出關的鬼才卡臣，他特地重讀所有C+文字，再加上「疑似專訪」中的對答，先Feel後解再整合，嘗試複製出「疑似C+」．

Medium Rare之露三點
第二捧由博客「禮服蒙面俠」接力，內文節錄自我倆的對談．他是我開博至今，唯一先從文字認識，繼而會面的博友．堅持以化名出現，據他說，是擔心人身安全...

Well Done之C+自白
壓軸登場，是親如哥哥的好友D！相識十載，絕對有資格講句「睇住我大，睇住我壞」．又，到底佢會否重提「裙下亡魂」一事呢？ 安排到的話，此文出街前或會加插小玩意． 好友D榮升老嗲，改由C+親手收拾爛攤子，自道愛情麵包所帶出的聯想．

希望大家多多捧場，支持一下C+小實驗之餘，也支持一下三位滿腔熱血，出手相助的猛男！

當宅女遇上鬼才

出賣自己，OK有效播．見大家咁捧場，等我又出賣下其他野先．

電郵「宅女的新衣」給卡臣時，郵來郵去，竟然譜出一段「疑似專訪」．交友以誠，網交半年，是時候拿點誠意出來．於是卡Sir有問，宅女必答．卡Sir直接得可愛，傳來的尖銳問題包括「揀衫見男友? 點呀? 個男人被妳俘虜咗啦?」、「聽聞妳男友是傳媒人，對嗎? 」等．

面對卡Sir，宅女不敢扮型，不單乖乖回應平日打死不談的題目，更自揭身世，道出「根本就係一個爛口宅女!」、「我係夜冷店店東，賣得既統統都賣！賣身都有得傾！」等等．

樂極忘形之際，宅女問：
「我覺得有好多野，女人做左，唔應該比男人知．佢受落，夠了．男人呢？有無d咩係為個女人做，但唔會比女人知？」

卡Sir道：
「除非賣血換錢來送包包給女朋友，otherwise，大鑼大鼓告訴女友自己點犧牲點偉大．」

女人與男人，真有這分別嗎？抑或宅女「宅毒」太深，慣於將一切收收埋埋，才有此等歪想？

又，任性的宅女，無視鬼才正處於請勿打擾閉關期，厚面皮請他出關，為她一個小實驗執筆．鬼才大方，即時答應，令宅女好生感動．

各位掛念卡臣的粉絲，要讀他的文字，下星期三便要來宅女的博咯！嘿嘿～
-------------------------------
又又，各位對藍裙仔的關注，令我考慮過擺晒三條裙仔上黎，聽下大家意見！

但當腎上腺素回復正常水平，還是放不下裙子的成本效益論．藍裙仔一旦於此首次曝光，面對意屬的「首名觀眾」時，成效會大大減低．為著物盡其用，Maximize裙子為他帶來的驚喜／困擾，唯有暫時收埋．

希望你地唔好噓啦！

宅女的新衣 ( 送給Carson)

宅女，不諳穿衣之道，不懂化妝技巧，更不懂營造髮型．尤幸身邊有兩位張家小姐，義務作形象指導，經過兩年「除宅行動」，初見小成．但女生宅性太深．未經兩位高人審批的行裝，理論上，可以穿；實際上，她不敢穿．

一天，宅女收到突發邀約，需要決定行裝．惟張大小姐忙於享受陽光海灘，無暇理會宅女死活．張二小姐在趕往開會途上，但亦善心地提議宅女於電話中，口述心水選擇，讓她作個定斷．

宅女：「Hm..紅色個條，新買架，個cutting同你個條橙色花花裙差唔多，黑色個條，咪你話我十世都唔著個條McQueen囉．藍色個條．．．」

二小姐：「紅色個條咩質地咩Length？你邊條McQueen呀，你條條都係黑裙，我點記得？藍色，咩藍？Navy? Sky? Cyan? 」

宅女：「紅色個條Knee Length，Satin？但有彈性架播，係咪Lycra先真？我唔知，令令地架囉．．． 」

二小姐怒吼：「妖你，買條裙你連咩質地都唔知？」

宅女被罵，心怯，細細聲以極有限的認知繼續口述．依依哦哦了兩三分鐘，仍然說得不清不楚．

掛線前，張二小姐拋下一句：
「打電話問功夫仲Work過你打電話問Fashion，好好反省下啦！」

碰了一鼻子灰，宅女只得望著三條裙子發呆．距離約定時間只剩九十分鐘，心急，一轉念，她想到新方法，去麻煩別的朋友．

她逐一穿上裙子，對鏡自拍，再以電郵及MSN征求協助．經五位不同年齡品味的好心男女審批後，以四票對一票通過黑裙子為第一選擇．

奈何宅女心中想穿的，明明是那條藍色裙子呀！死不忿氣的她，竟然在想 「這幫人，根本不明白裙子的成本效益論．還是問問小S安全！」

她再次拿起電話，撥了一通IDD到印度，以友情要脅Evil Twin 的小S即時上網，為她作最後決定．小S無奈答應，但說要十至十五分鐘後才能上線．宅女趁這個空檔，以極速洗頭沖涼，跳回電腦前時，小S剛登入MSN．

小S：「睇左你d相啦．你想佢心藏病發，藍色；唔想佢死住，黑色啦…喂你d頭髮記住紮起，但唔好立死All Back．．．」
宅女：「喂開Webcam丫！」
小S：「唔係屋企，無Cam．．．」
宅女：「下！？」
小S：「屋企Internet神左，要去Internet Café．今晚咩Plan呀？喂你諗住著邊對鞋呀？」
宅女：「I MISS U SO MUCH! (喊樣Icon)」

(完)
此文同步於卡臣博客作全球首播!!!
--------------------
Blog界鬼才卡臣說要休博至三月，Eric提議由讀者串場，以作回饋．聖誕時收過卡Sir為我寫的一口咬定你，禮尚往來，當然要參一腿出分力．

本想寫個以卡Sir作主角的故事，奈何欠缺過人想像力，還是出賣下自己的宅女生活安全．卡Sir讀過，竟戲言我送他一篇少女心事，還質疑我是否「扮野」！哼哼哼，實在可惡極了！

可我還是捨不得罵卡Sir，就算不感謝他經年地為我們帶來抵死過癮的文字，也得感激他連續寫廿三個故事送予Blogger的心思毅力．

這個靚仔，實在太抵咬了．(喂，到底前後爭你幾多啖呀？I lost count...)
--------------------
附上黑裙照片一張，以証真有其事，還是早幾天才發生的！宅性，果真難移！

宅女再培訓

週六，Girls Night Out．艾雲娜問張大小姐
「要做一個靚女，係咪一刻都唔可以鬆懈，要時時都Keep住靚？」

曾經我好疑惑，點解張大小姐落街放狗，著件背心，加條綿質運動褲，都咁索咁正，但我著上身就成個阿嬸？自己先天條件不足，由九歲識佢個日已經知道．但，無理由爭九十九條街咁遠架．

之後寄居係佢屋企一段時間，慢慢我觀察到，就算落街放狗，佢都要起碼搞廿分鐘先出得門口．到底搞咩呢？

佢紮條馬尾，唔係我亂咁伶橡筋紮住就當係．係用梳好仔細咁紮，我以為不經意既零亂，原來係有技巧地營造出黎．呢Part，用左6分鐘．佢著個件背心同條綿質運動褲，買個刻已經有揀Cutting／質地，出街前仲會襯一襯，有時又撞下顏色，令個Look望落有Sharp醒既感覺．呢Part 又用左8分鐘．跟住佢會花三分鐘企係鏡前面．檢查下個樣同Look，再順手戴埋適合既耳環／手鍊／頸鍊．最後三分鐘，用黎著鞋/綁狗/伶報紙鎖匙．

個時我諗，嘩，煩到咁．唔好搞我！但因為實在等得太耐了(Weekend 去玩阿大小姐起碼要九十分鐘先出得門口囉唔該)，咁我橫事坐係到呆等，咪學佢搞下呢搞下路當消磨時間．搞搞下，發現同一件衫，襯唔同妝／髮型，可以Dress Up / Dress down，有唔同感覺，換句話說，可以買少左野．又，當有朋友仔突然間講句「咦你呢排靚左喎．」，「你今日咁著幾好睇．」，口可能答係咩係咩？但個心，開心到飛起．

以前覺得You are what your wear 絕對係一句Marketing Slogan！衫之嘛，不過係一張花紙唶，駛唔駛講得咁嚴重？

但而家我開始成為信眾！尤其當我發現，張花紙吸引，唔單止會更加顯眼突出，亦會加強他人好奇心，令佢地更想知道花紙入邊包住乜野．（I am talking about the soul / brain, not the body u dirty freaks）

係，開頭真係覺得好煩，但慢慢習慣後，其實又係一種紀律，對自己既一種要求．Wyman曾經寫過一篇喂，你點揀衫o架？，我好同意下面呢幾句:

－ 要穿得好襯得靚，首要條件是要知啲嘢喺邊度搵返嚟，正如煮席好菜關乎於最美味的食材自那兒找，這點修煉不能懶。

－ ….(佢)出手就係襯得咁靚，本能嚟嘅，修養嚟嘅，唔通專登襯得肉酸啲？冇人見到嘥唔嘥？一啲都唔嘥，當係襯衫練習最好，平時喺河北省金川鎮體育館，喺冇觀眾情況下也揸正嚟做練練練，他日參加奧林匹克上鳥巢才不會在幾千萬人面前失手啊！

－ 要着衫襯衫所謂進步，必須由你未試過的東西組合開始，即係你以為「唔着得出街」的衫。

又，做咩講著衫？聽日開估！

一於豪比八和!

阿姐怒吼個番“肺腑之言”，令我不期然激動到大聲嗌左句 “Yo你個肺”十卜一下．

兩班人爭地盤，講到底，睇邊邊人強馬壯，鬥牙力鬥實力．假如香港創意工業終成氣候，受惠既包括電影／電視／設計／產品／動漫（仲有N樣唔該自己數），唔好忘記，全部都係可以Export到架窩．咁粵劇呢？再持續發展，有咩機遇？可以製造幾多就業？可以Generate到幾多經濟收益？

如果粵劇真係有價有市，點解經營一年會比一年困難？

Market Demand & Supply 唔識講大話．當市場不斷萎縮，可以嘗試反抗，例如試下Product Development, Brand Repositioning & Relaunch 等去boost up．但粵劇作為國粹，到底有幾大空間可以推陳出新再發圍？難道八和打算請玲玲姐上台Rap返句“落街無錢買麵包Yo Yo Yo”，做個帝女花Crossover？

成日話搞西九西九西九，香港作為一個國際都會，藝文水平一直同世界脫軌．咁點樣培育我地既下一代社會支柱呢？係咪應該由教育做起呢請問？咁而家有間叫花旗國藝術學院，托埋錢黎開分校，請問又有咩問題呢？

可能阿姐細個忙住拍戲，自己又無仔女，唔明白一個有志報讀創意工業課程既年青人係香港幾咁絕望．無錯，家下市面上Course多到咪埋眼肯填Form就總有一家收你．但咩質素先？Most of the time they kill ur creativity than to develop it. 終於有間叫做世界級藝術學院自己托埋錢黎開分校，佢話政府So外國人！？

對唔住，我知我已經Loop左幾次 “人地托埋錢黎”．但呢排政府玩開倉好似上左癮咁，竟然連支助一半人工，鼓勵建造業請班零經驗既中學生都夠膽提出．咩事呢？而家建造業人人有工開乎？有無諗個班失業工友，年紀大學歷低溫工難，舊時都仲話可以主動提出減薪，而家又有最低工資壓住，退無可退．咁點算呢，咪排隊拎眾援囉．

定係政府已經Absolutely Positively Sure，十大基建工程可以養起晒老中青三代建造業工人先！？咪住，眾援係納稅人錢，十大基建工程又係納稅人錢，支助班零經驗中學生都係納稅人錢黎架播．

咁唔爭在豪埋比八和啦！咁有歷史意義既國粹，我地實在應該好好保育，等我地下一代有機會了解同認識．我地絕不能眼白白睇住粵劇從此絕跡．

一於撥筆特別經費，將佢地一氣過送晒入歷史博物館啦．

八號仔的自白

上星期入馬場，企係沙圈邊一路傾計／飲Stella／煲煙，唔經唔覺，竟然睇到第七場唔知xx盃賽．頒獎，理論上唔關我事，但當我聽到呢句，我又即刻萌萌地．

".... presenting the award, MRS yyyyxxx, the wife of MR xxx and MR. xxx"

我: "MRS已經表達到啦．．．點解係都要講埋 The wife of XXX？Are we still in the 70s when women are accessories to men on the race course?"

他: "你萌乜野唶，第時你叻到人地介紹你老公時，會話MR. XXX，The Husband Of Ms. Cecilia Lau 咪得囉．我唔介意做Chan Jen Chung架喎！"

佢咁講，Makes Senses，但諗多兩諗，我又忍唔住再講

"喂，之但係我想做阿太喎！"
"咁就比較難d啦，因為你識字．"

雖然對小朋友無感覺，但我唔排除有朝一日我會做媽咪．不過有兩個先決條件：

1) 要做全職媽咪
2) 唔係大城市養大個小朋友

婆婆成日話，我同我媽咁親，因為我媽親手湊大我．又，聽朋友講，大仔由工人湊大，到細仔三年後出世，老婆先辭工做全職媽咪．而家大仔十一歲，依然係無手尾乜都要人服侍既大少；而細仔呢，就好有手尾，仲會主動幫下手做家務．

我問佢，細仔係咪巨蟹座搭處女座？佢就好激動地咆哮 "妖，大仔係處女搭山羊，細仔係獅子加人馬！"

我信命，但我更相信童年對個人成長極具影響力．所以好希望將來，自己既小朋友可以係充滿愛，以及正確價值觀下成長．我想同佢地一齊上山下海，想佢地就算食薯條，都會係我親手做既Home Made Fries，想佢地開心快樂依隨自己本性．．．

當然我係好明顯地發緊夢．閒時睇周遊寫方芳方悠，佢個份"巴巴聲"湧晒出黎既母愛，竟然可以感動到我眼濕濕．我係見到小朋友會避開既宅女囉唔該．咁都不特止，呢個Lousy Ma仲成日都幫兩個女影埋d似沙龍多過生活照既靚相，不定期黎個"霖死人唔洗本大行動".

真係有機會做媽咪的話，我唔相信我會比我媽或者周遊做得更好．

咁我媽到底又有幾好呢？

我想話，直到十四歲，每逢冬天，我媽會係我沖涼時，將d底衫褲係乾衣機一路暖住，直至聽到我關水喉先拎入黎比我著囉．

我想話，當年我話要去"流浪"，佢一句無問就過左廿萬Asia Miles 比我，仲叫我有咁遠去咁遠，有咁耐去咁耐．

我想話，佢根本就係廿幾年前，將佢一生所有，買重係我呢隻8號仔身上．明明以為係十足把握既藍籌，點知經過d咩蛇吞象合拼再私有化 (Aka跟佬走)，搞到今時今日渣都無．

唯一比較"好彩"既係，媽始終係我既Angel Investor，我所有既一切，好既醜既，佢都楂死左九成股份．雖則佢係Slient Partner，但當我心知就算對唔住全世界，都一定要向一個人要交代時，我就會不期然Clam Down落黎．

所以有得揀，我都係寧願揀養十隻狗，多過要一個細路．自己做左八號仔咁多年，你叫我重注買返落另一隻再世八號仔？

唔好玩啦．
-------------------------------------
PS ( 我係唔鍾意細路，但遇上我契仔，一樣情難自制，霖死了！)