Social Gathering 101 - Update

拖左咁耐先出呢篇，sorry. 即刻入正題．

我想話呢，其實篇Case Study，我都唔肯定有無八個Point...！
又，既然已經有嘉賓客串解說，咁我無謂又Loop一次, 寫堆同樣野啦係咪？

(唔好噓住先．)

相信你一路睇篇Case Study，心裡點都數得出一兩個錯point卦？如果自覺Social Skills唔掂，當你抽身Review自己時，你都知自己衰乜，亦知自己應該點做架窩．

重點問題係
點解你唔做先？

又，如果你真係盲到一個point都找唔到，可以參考下小瓶子／黑人／Double Chin + Triple Anon 留言．

或者問下朋友，假設有的話．
但有咩好得過問自己？

怕煩？怕淤？怕樣衰？覺得好虛偽好假好無謂？唔想晒心機捱眼訓？調返轉頭，都有人係太想識人，可能想型想威，於是太熱情，又或者唔夠識相．

又一個重點
點解會有呢d想法先？

或者應該問，
點解將呢件事睇得咁難先？

＊　＊　＊

收視率暴跌，我知．
應該寫d實用篇，即係交談手法技巧谷谷佢，我都知
Next week, 艾波密時．

呢排搞<情人節派對>，做到想死．
但都有d觀察幾過癮，希望寫得切，聽日應下節．

＊　＊　＊

至於利誘，其實我個個都想比．（哇可唔可以再行d呢!?）
Anyways, the winner is 小瓶子．
Thanks for your support/ link / time / respond to my social 101 series.

艾甩唷柯！Xoxoxoxoxoxxoxoxoxoxo

Social Gatering 101 - Case Study

週四晚，LKF酒吧內，Networking Happy Hour.

Invitation 上寫著聚會由七點半開始，一直以守時自傲的你跟友人準時到達．眼見場內得小貓十餘隻，你倆到吧檯拿過一瓶啤酒後，很自然地走到一個不太惹人注目，但又可以望到門口的位置．

三十分鐘過去，你跟友人依然站在同一角落，有一句沒一句的閒扯著，但目光卻不時盯著門口．誰進來誰離開，你不單心中有數，更暗自在心裡打上剔或交叉．

然後，一名剛進場的異性不經意地望向你，四目交投，你立即把頭轉向另外一邊，向他/她展示 "拿，你唔好意為我特登(目及)你啊！"的姿態．

你努力的把頭保持在那一個"避免誤會的角度"，唔，大概有分半鐘左右吧，你眼尾睄到她已經行開，才敢把頭放回一個正常的角度．

呢個時候，你開始有一絲懷疑: "其實，頭先果個，都好似得得地架窩"．．．．

想再望多兩眼，但已經太遲了．諗多兩諗，你終於打破　Dead Air　七分鐘的悶局，開口問友人

"喂，頭先入黎時望住我果個男(女)仔，你覺得O唔OK啊?"
"邊個呀？”
"呢，著黑色衫果個呢"

友人將目光從左到右一掃，企圖從在場的六七十人當中，找出你所說的目標人物．奈何穿黑色衫的人實在太多，他只能滿臉茫然地回你一個 "下!?!?!?"．

失望之下，你開始在黑陌陌的酒吧內，依靠微弱燈光，嘗試以眼睛找回他／她所穿的那件黑衫．

手上那瓶啤酒越來越暖，而你的一雙腿也開始酸了．但心內又有一絲不忿，因為你未能證實他／她的質素如何．死死地氣走到吧頭，買來另一支冰凍啤酒，又自然地走回那個安全的角落，企在友人身旁，繼續你的搜索行動．

這一次，你只拿著啤酒站了二十分鐘，友人便提議離開．你心裡暗嘆 "唉，今晚都係無運行架喇，都係收隊罷啦．"

一個月後，朋友再叫你去同類型聚會，你已經無乜興趣再參與．

因為你覺得，早d返屋企打機／訓覺／上網好過．

* * *
係呢個Case Study裡面，我收埋左八個我認為可以改善的地方，打算下篇先解話．

但打完，我又突然間覺得，得我講無人講，好悶．每個人觀點角度都唔同，同一個Situation 下，一定有唔同睇法做法．如果有人樂意幫手解話分享下，咁我地咪可以一齊學多幾招？

咁跟住呢，我當然又開始抽起條筋啦．

喂你地都陪我顛左咁耐不如一齊寫下啦喂！
試於前文中，找出五個你認為<你>可以改善的要點，加以重寫，令一個悶到爆的夜晚變為Fun Night. 終極目標為：當下次再得知有同類型活動，<你>會好好好樂意再參與．

喂就不如就試下利誘你地啦！
最多咁，如果真係有人肯陪我顛，寫得最好果個，有獎．

咩叫最好？無Standard 架，我覺得最Likey架囉．

獎乜？你話啦 (Within MY REASONS 呀唔該)．唔想諗都得，我會比幾個我認為你會Likey 的option 你．另，外地網友，我應承我會寄DHL ok!?

有意齊齊玩者，煩請週日(8/1)前Email 至 lau_cecilia@ymail.com

* * *
喂如果真係無人睬我，都真係幾淤架窩...

不過無所謂啦，我都仆慣街架啦．

呵！

Social Gathering 101 - 心理調整

不論你參與Social Event 的最終目的為何，請緊記世界上無任何事會"包生仔"．

講真，你再淤，有幾多人識得你？見到你淤o既，兩個月後係街見到又會唔會記得你？

如果佢真係記得你，或者因你淤事認識你，咁我同你講聲恭喜晒．

You made a hell of an impression.

* * *
心理調整，好重要．例如，電車男成日覺得無女仔鍾意，但我想話，我識好多靚女，都對Nerds特別有興趣．

前題係，係你遇到呢幾個靚女之前，你肯唔肯信世界上真係有靚女，會專吼電車男先？

你唔好扯我，我心目中永恆女神，100% 純正本地美女，現正單身．佢自十三歲開始煲美日動漫，廿歲開始打Game，後來仲打War Craft 打到比Blizzard 請埋做Freelance，而家手下帶住近50個Gamer幫Blizzard開工．

喂，我講真架．佢仲要唔Nerdy o既唔鍾意囉唔該．

學燦叔話齋，"百貨應百客"．但如果你身為Supplier都對自己產品無信心，咁你係咪應該先將產品 QC 到合理兢爭力水平，再嘗試 Marketing呢？

* * *
下邊呢堆係我嚴重宅女時期，自己同自己講過o既娘野．可以Skip，不過我都捱眼訓打左咁多字，唔爭在擺喇唉．

1/ 怕醜
非壞事，仲有人認為是可愛(!?)的一件事．但怕醜之餘，唔好吝嗇笑容．寧願係咪都笑，都一定好過木無表情或黑口面扮Cool．

2/ 等人撩傾計
都無問題，但前題係令人知道"你有意慾去同人傾計"．瑟縮一角，唔好話同你傾計，有無人見到你都成問題啦．

3/ 只渴望與合眼緣的異性交談
呢個世界唔係男人就係女人，你凈係想同異性講野，我明白，但同時亦提醒你，世界充滿可能性．例如，你可能識到一個同性，因而識到十個八個異性．F*ck the competitive shit, you need allies.

5/ 自覺包裝不夠吸引
你再索再正再靚，索靚正唔過曼玉志玲朝偉劉華．但再醜再難o更，又不是慕鍊如花八兩金之流．凡人，就是比上不足比下有餘的一群，Which is the majority.

你對自己無信心，比件亞曼尼Black Label你著都唔會覺自己得．

(我只不過想話，我識o既"最受歡迎人物"內，無幾多個係靚爆鏡．靚爆鏡的一兩個，我肯定你傾三分鐘計已經想爆樽了．)

6/ 認為在場參與人士的最終目的不是錢便是性．
出得黎Social Gathering，大家都係想輕鬆下，識下人，何苦太斤斤計較？

又，如果真有人對你的錢/ 身體表現興趣，you should learn to take it as compliment.

又又，有無人發現我特登漏左邊個Point 未講呢？

* * *
我不是專家，沒有兩三招"必殺技"教你．
我不是才女，欠缺深厚文字功力，無法簡潔地以Point form逐點激破．
我只是一名宅女，抽起條筋，想分享過去兩三年間比較深刻的體驗．

下次，下次我地做Case Studies 喇好無？ (如果仲有人想睇)

未能貼題 - Social Gathering 101

Social Gathering 中，新手常犯錯誤包括

1/　怕醜(淆底)
2/　等人撩傾計
3/　只渴望與合眼緣的異性交談
4/ 不懂得如何展開有趣的話題
5/　自覺包裝不夠吸引
6/ 認為在場參與人士的最終目的不是錢便是性．

任何認同兩項或以上的人，我敢保証他們一定是躲在角落喊悶的一群．作為一個旁觀者／參與者，我明白人一但離開熟知環境，會對未知懷有恐懼．但假如你已經踏出"願意參與"的第一步，何不放輕鬆試試Enjoy the party?

唔，又要賣個關子先．因為今日想講其他野．呵

* * *
最近，瘋狂迷上了一個名為 Dating A Banker Anonymous的博．

Introduction of the blog -
Are you or someone you love dating a banker? If so, we are here to support you through these difficult times. Dating A Banker Anonymous (DABA) is a safe place where women can come together – free from the scrutiny of feminists– and share their tearful tales of how the mortgage meltdown has affected their relationships. DABA Girls was started by two best friends whose relationships tanked with the economy. Not knowing what else to do, we did what frustrated but articulate girls have done since the beginning of time - we started a blog.

人情冷暖，一覽無遺．無奈得，讓我想起卡門的歌詞．

* * *
香港作為金融都市，縱然面對金融海嘯，仍有許多女子懷有"嫁個好賓架"的想法．

找個好歸宿，千千萬萬女子的夢想．作為目擊証人，曾經目睹女子接過哥兒名片時，雙眼是如何放光．

對呀，他名片上的title是VP，住在南區某某灣的兩千呎公寓，平日外出消費，刷的是Amex 白金卡，而他的座駕，是一輛超型的哈利．

但親愛的，三十三歲的他，實際年收入不到百萬．在銀行界，不過是一個比小薯更小薯的人物．他的title 及福利，一是因為HK Office headcount 細，二是因為 the differences in EU taxing system.

當他花的錢大都不是自己的，當然豪爽．一旦被裁員，要回祖國找一份合理的工作，After tax 所賺的，可能比你現在實賺的更少．

* * *
又娘爆的說句，人生的伴侶，不止可以共患難，也不淨是共富貴．

可以共渡餘生的人，是當回歸恆常平淡之時，也願意緊握你手的那個人．
* * *
唔型丫嘛，都話知囉！