Friday, August 15, 2014

澳門咆哮時....

今日係澳門的士站比兩個強國麻甩佬打尖,我就怒啤佢,好認真地同佢地講:「唔該排隊。」

後面有人以為我唔識煲冬瓜,仲同我翻譯囉。

點知佢仲扯開嗓門惡人先告狀:「我們有排!車來了這麼久,你不動我們就去囉。怎麼知道你要坐是不坐!」

我聽到梗係扯火,縱然我已經四十個鐘無大聲講過一句說話。

正當我開口打算咆哮之際..........................

我流左口水囉。

係一開口就流囉。

仲唔小囉。
係流到落下爬好在無滴落心口囉。

成條隊十幾個人都O咗嘴。
包括果兩個麻甩佬。
其中一個仲笑左囉。

之但係,我抖住啲口水都仲要咆哮囉。

「車裡頭有人,你看不出來的嗎?那我怎麼上車?」然後就用手指篤我自己個頭:「用一下你的腦袋,可以嗎?還有,你排在那?這車我不要,也輪不到你!」

然後就轉身上車。
跟住連我自己都忍唔住喪笑囉。

下午四點半,我仲係尋晚個PARTY LOOK,踢住對四吋高高根鞋,但已經係一滴裝都無的素顏,一邊膊頭咩住個CLUTCH,但另一隻手係拎住個黃色背心膠袋(杏仁餅),要排隊搭的士已經夠YAP,仲要係街頭開口鬧人,但一開口就流口水囉唔該。

然後當我同的士司機講事發經過時,佢竟然話:
「係囉,啲大陸人搞到你哋女士出街想LADY啲都唔得囉!」

哈哈哈哈哈哈。


然後頭先話比阿娘聽事發經過,佢竟然話:

「女,你見到強國麻甩佬都流口水?」

2 comments:

卡臣 said...

哈哈~睇到男人流口水

C+ said...


見到佢地,爭啲連鼻涕淚水都出埋呀!哈哈哈!

 
Clicky Web Analytics