Thursday, March 5, 2009

Overcooked 之 C+內情

如果一定要係麵包同愛情二選其一,是但揀一樣我都無所謂。

以我性格,我絕對唔排除人老珠黃時,兩樣都無。所以一諗到:「如果兩樣都無,我係咪呢世都唔會幸福快樂?」時, 我發現,「自己」先係最緊要。

失去自己,Insecurity自然而生。當每日活於憂慮之中,驚衰佬偷食,怕阿邊個想呃自己錢,心難安夜難眠,幾多錢或愛情都彌補唔到。

又,都叫做左人一段日子,我信單方面去Take人地比既野,佢唔單止隨時伶得走,將來亦一定要還,而且D息口仲分分鐘高過貴利。

所以,揀乜都得,前提係,唔可以要我放棄自己。單身呢兩年,其中一個學習重點,就係感情上自給自足。幸福快樂,唔應該靠他人提供。學懂令自己幸福快樂,自然可以感染到身邊既人。

唔扯咁遠,返番去愛情麵包呢個問題。問題係,問題本身就唔Make Sense。

首先,發問者將個context predefined左為我想係佢身上得到某種東西。喂,錢我都識識地賺,愛又唔係淨係佢先肯比我,Counter offer,我唔一定要Accept唶,下話?

再黎,點解局限左我只可以係愛情麵包二選其一?我要愛,但唔限於愛情得唔得?我要錢,但如果錢會令我出賣朋友,我可唔可以揀義氣?又或者,娘d講句自由價更高,佢又奈我咩何呢實在?

唉,所以話性格主宰命運。我向愛情麵包兩空之路,又邁進左一大步。

另,雖然原則上,愛係無國籍顏色之別,但我絕對係港佬Fans!之但係遇著呢位港佬,我實在有幾秒想爆樽囉。

拿,所以我情迷拉丁男,好明顯係被迫架!=))))))

================================
好快講兩句,煙稅加五成,我地都繼續照食,係咪証明到我地食煙既堅定決心先?咁當我地被逼企係街邊打邊爐時,途人可唔可由於我地對尼古丁既忠誠,加兩分尊重係d兇狠眼光入面?

13 comments:

篤篤篤撐 said...

o甘你會幫襯買私煙嗎 ?

Betty said...

>>>情迷拉丁男???

边个?

卡臣 said...

>>我實在有幾秒想爆樽囉。
==>我笑死咗!

Morca said...

人地黎講數喎,緊係爆佢樽啦!

宜家都仲可以喺酒吧食...
遲啲一定要喺街打甂爐囉...

C+ said...

RE:篤撐
一定唔會,尤其我好抗拒擺d來歷不明既野入口!

***
RE:瓶子
>>>>>边个?拉丁男???

所有得唔得啊???

***
RE:卡Sir
引到你笑,我覺得好榮幸!

***
RE: Morca
嘿,我已經知有幾間酒吧無打算七一後禁煙!

Anonymous said...

>>...唔可以要我放棄自己... - 做得到就係最好不過!

>>...我向愛情麵包兩空之路,又邁進左一大步... - 真係一個明天會更好feel.

>>....咁當我地被逼企係街邊打邊爐時,途人可唔可由於我地對尼古丁既忠誠,加兩分尊重係d兇狠眼光入面?...

妳既然咁講到出口啦,我從今都會對你地呢班忠誠尼古丁fans加上一分尊重啦!!係卑面妳架咋!

Anonymous said...

好快講兩句,煙稅加五成,我地都繼續照食,係咪証明到我地食煙既堅定決心先?

有好多人都唔係買港煙喎!!

因為你呢句說話,如果比我見到你,我既眼神裡面一定會加多4分尊重.

C+ said...

Gwen gwen gwen! 我又要loop一句,做人最緊要自己爭氣!YooHooo!!

And thanks! It's really tough being a smoker these days.

* * *
雙子C,我打死唔買私煙,唔係要話比人知我型,只不過食煙已經死快d時,食d來歷不明既煙會死得再快d!

我只怕死得太早,令朋友仔失去人生終極盼望!=p

L L said...

C十, 欣賞你還欣賞你,但我真係唔中意人食煙。當然喇,喜歡係你嘅權利,唔中意又只係我嘅感覺。

我有篇舊文叫 [煙毒],有機會 post 出黎,你有時間可以看看。

愛情當然不是人生最必須的東西,沒有愛情人生也可以很漂亮,可以複雜得美麗得令人目眩。

麵飽需要,但正如我所講,在香港,基本上已沒有人會因沒飯開而餓死。我們希望伴侶富裕,只不過是想有較好的生活條件。冇問題,但本末不能倒置咯,我希望我愛的人有錢,但不是希望有錢的人係我的愛人。

Anonymous said...

>>學懂令自己幸福快樂,自然可以感染到身邊既人。
睇左成篇,最啱就係哩句。其他的都可能啱嘅,但我唔明啦,太有當事人的觀點味道,呀叔就唔好出聲啦,當睇唔明,哈哈!

>>打邊爐時,途人可唔可由於我地對尼古丁既忠誠,加兩分尊重係d兇狠眼光入面?
係囉係咯!!

繼續神秘僅嘅大叔

ps : 都話 overcooked 妳喇,仲好意思問埋啲愛情呀、麵包呀、牛油菓醬呀哩啲問題嘅?

C+ said...

劉兄,絕對同意!我日唔明,一段關係,點能夠由貪念主導!一想起,我覺得好恐怖!

>> 喜歡係你嘅權利,唔中意又只係我嘅感覺。

對你,又添幾分敬意了!

>> 我有篇舊文叫 [煙毒],有機會 post 出黎

熱切期待中!

C+ said...

扮神秘嘅大叔:

唉,打這編文時,心亂如麻引置思覺失常,自我太大,但真情又不能明言.

唉唉,體諒下得唔得先!?

Anonymous said...

Who knows where to download XRumer 5.0 Palladium?
Help, please. All recommend this program to effectively advertise on the Internet, this is the best program!

 
Clicky Web Analytics